Startaplar va innovatsion g‘oyalarni rivojlantirish masalalari muhokama qilindi
2026-04-17 18:30:00 / Yangiliklar
O‘zbekiston davlat jahon tillari universitetida talabalar ishtirokida “Startap loyihalar va innovatsion g‘oyalarni ishlab chiqish hamda ularni amaliyotga joriy etish” mavzusida seminar-trening va ochiq muloqot tashkil etildi.
Tadbirda Yoshlar akademiyasi rahbari A.Sobirxonov hamda Innovatsion rivojlanish agentligining startap masalalari bo‘yicha mas’ul boshqarmasi vakili S. Shukurov, shuningdek, tegishli vazirlik va idoralar mutaxassislari ishtirok etdi.
Uchrashuvni universitet rektori I.Tuxtasinov ochib berib, mamlakatimizda yoshlarga yaratilayotgan imkoniyatlar, startap va innovatsion faoliyatni rivojlantirishning ahamiyati haqida so‘z yuritdi. U yoshlarning ilg‘or g‘oyalari iqtisodiy taraqqiyotda muhim o‘rin tutishini ta’kidladi.
Tadbir davomida A.Sobirxonov talabalar bilan ochiq muloqot o‘tkazdi. Ishtirokchilar o‘zlarini qiziqtirgan savollarga javob oldilar hamda o‘z taklif va tashabbuslarini bildirdilar. Shuningdek, Oliy ta’lim, fan va innovatsiyalar vazirligi hamda “INNO” texnopark tomonidan yaratilgan mavjud imkoniyatlar, grant dasturlari va qo‘llab-quvvatlash mexanizmlari yuzasidan ma’lumotlar taqdim etildi.
Seminar-treningda S.Shukurov tomonidan startap loyihalarni yaratish bosqichlari, innovatsion g‘oyalarni rivojlantirish va ularni amaliyotga joriy etish mexanizmlari yuzasidan tavsiyalar berildi. Shuningdek, ilmiy tadqiqotlarni qo‘llab-quvvatlash va istiqbolli tashabbuslarni amalga oshirish masalalari muhokama qilindi.
Tadbirda startap loyihalar tanlovida muvaffaqiyat qozongan talabalar o‘z tajribalari bilan o‘rtoqlashib, amalga oshirilgan loyihalar va erishilgan natijalar haqida ma’lumot berdilar.
Seminar yakunida yoshlarning innovatsion fikrlashini rivojlantirish, ularni ilmiy va amaliy faoliyatga keng jalb etish hamda startap tashabbuslarini qo‘llab-quvvatlashni yanada kuchaytirish muhimligi qayd etildi.