O‘zbekiston va Xitoy ilmiy-texnik hamkorlikni rivojlantirish bo‘yicha kelishuvga erishdi
2026-04-17 11:40:00 / Yangiliklar
Xitoyda O‘zbekiston–Xitoy Hukumatlararo ilmiy-texnik hamkorlik bo‘yicha quyi komissiyasining yettinchi yig‘ilishi bo‘lib o‘tdi. Unda O‘zbekiston Respublikasi Oliy ta’lim, fan va innovatsiyalar vaziri o‘rinbosari O‘ktam Salomov hamda Xitoy Fan va texnologiyalar vaziri o‘rinbosari Chen Szzyachan boshchiligidagi delegatsiya vakillari ilmiy hamkorlikni chuqurlashtirish masalalarini muhokama qildilar.
Muloqot natijasida sun’iy intellekt, raqamli texnologiyalar, agrobiotexnologiya, yangi materiallar va “yashil” energiya kabi ustuvor yo‘nalishlarda qo‘shma loyihalarni ko‘paytirish hamda ilmiy infratuzilmani birgalikda rivojlantirishga kelishildi. Shuningdek, tomonlar texnologiyalar transferi va ularni tijoratlashtirish tizimini yo‘lga qo‘yish, qo‘shma fond va texnoparklar tashkil etish hamda yosh olimlar almashinuvini kengaytirish bo‘yicha aniq vazifalarni belgilab oldilar.
Mazkur kelishuvlarning davomi sifatida quyi komissiyaning navbatdagi sakkizinchi yig‘ilishini 2028-yilda O‘zbekistonda o‘tkazish belgilandi.