Innovatsion rivojlanish agentligi direktori samarqandlik yoshlar bilan ochiq muloqot o‘tkazdi
2026-03-03 19:15:00 / Yangiliklar
Samarqand shahrida Innovatsion rivojlanish agentligi direktori v.v.b A.Norov ishtirokida yoshlar bilan ochiq muloqot tashkil etildi. Uchrashuvning asosiy maqsadi — hudud yoshlarining ilmiy-tadqiqot va innovatsion faoliyatga qiziqishini oshirish, startap tashabbuslarini qo‘llab-quvvatlash hamda ularning taklif va mulohazalarini eshitishdan iborat bo‘ldi.
Muloqot davomida mamlakatimizda innovatsion ekotizimni rivojlantirish, ilmiy loyihalarni moliyalashtirish, startaplarni tijoratlashtirish va yosh olimlarni qo‘llab-quvvatlash borasida amalga oshirilayotgan islohotlar haqida batafsil ma’lumot berildi. Shuningdek, grant tanlovlari, innovatsion dasturlar hamda venchur moliyalashtirish mexanizmlari yuzasidan atroflicha tushuntirishlar berildi.
Samarqandlik yoshlar tomonidan IT, agrotexnologiya, “yashil” iqtisodiyot, tibbiyot va ta’lim sohalariga oid innovatsion g‘oyalar taqdim etildi. Ayrim loyihalarni amalga oshirish jarayonida yuzaga kelayotgan muammolar, xususan, moliyaviy resurslarga kirish, laboratoriya infratuzilmasining yetishmasligi va mentorlik qo‘llab-quvvatlovi masalalari muhokama qilindi.
Uchrashuv yakunida Agentlik tomonidan yoshlarning istiqbolli tashabbuslarini amaliy qo‘llab-quvvatlash, ularni ilmiy markazlar va texnoparklar bilan integratsiya qilish, shuningdek, hududiy innovatsion infratuzilmani yanada takomillashtirish bo‘yicha aniq chora-tadbirlar belgilandi.
Mazkur ochiq muloqot konstruktiv ruhda o‘tib, yoshlarning innovatsion faolligini oshirish hamda Samarqand viloyatida ilm-fan va texnologiyalarni rivojlantirishga xizmat qiladigan muhim platformaga aylandi.