Innovatsion rivojlanish agentligi va Intellektual mulk markazi hamkorlikni yangi bosqichga olib chiqmoqda
2026-02-18 14:45:00 / Yangiliklar
Innovatsion rivojlanish agentligi hamda Intellektual mulk markazi vakillari o‘rtasida sohada o‘zaro hamkorlikni yanada takomillashtirish masalalariga bag‘ishlangan uchrashuv bo‘lib o‘tdi.
Muloqot davomida intellektual mulk obyektlarini muhofaza qilish jarayonida uchrayotgan tashkiliy va texnik muammolar atroflicha muhokama qilindi. Xususan, patentlarning haqiqiyligini tezkor tekshirish, muhofaza hujjatlariga oid ma’lumotlardan samarali foydalanish hamda amaldagi imtiyozlarni qo‘llash jarayonida axborot yetishmasligi sababli yuzaga kelayotgan qiyinchiliklar tilga olindi.
Uchrashuvda mazkur muammolarni bartaraf etish maqsadida qator takliflar ilgari surildi. Jumladan, tashkilotlar o‘rtasidagi ma’lumotlar bazalarini o‘zaro integratsiya qilish, muhofaza hujjatlarini onlayn tekshirish tizimini joriy etish, shuningdek, imtiyozlarni avtomatik tarzda taqdim etish mexanizmlarini ishlab chiqish zarurligi qayd etildi.
Ta’kidlanganidek, ushbu tashabbuslar tizimni izchil raqamlashtirish, ilmiy ishlanmalarni tijoratlashtirish jarayonini soddalashtirish hamda innovatsion faoliyatni qo‘llab-quvvatlashning samaradorligini oshirishda muhim ahamiyat kasb etadi.