Innovatsion ekotizim boʻyicha Vengriya tajribasi oʻrganilmoqda
2025-11-27 18:55:00 / Yangiliklar
Ayni kunlarda Innovatsion rivojlanish agentligi vakillari, Respublikamizning innovatsion hududga aylantirilayotgan tuman hokimlarining innovatsion rivojlanish boʻyicha oʻrinbosarlari, hududlardagi innovatsion rivojlanish shu’balari mudirlari hamda yoshlar texnoparklari rahbarlari Vengriya davlatida xizmat safarida boʻlib turibdilar.
Jahon bankining “Oʻzbekiston milliy innovatsion tizimini modernizatsiya qilish” loyihasi mablagʻlari hisobidan amalga oshirilgan xizmat safari innovatsion ekotizimga oid ilgʻor tajribalarni oʻrganishga qaratilgan.
Dasturga koʻra delegatsiya vakillari Budapesht ishlab chiqarish va texnologiyalar parki — “BITEP” faoliyati bilan yaqindan tanishdilar.
Ekskursiya davomida Vengriya texnoparklarining joylashuvi, infratuzilmasi va mavjud imkoniyatlari haqida dastlabki maʼlumotlar berildi. Shuningdek, 65 gektar maydonni egallagan ushbu sanoat hududida faoliyat yuritayotgan 300 dan ortiq kichik va yirik ishlab chiqarish korxonalari faoliyati oʻrganildi.
Shuningdek, “BITEP” rahbariyati bilan amaliy uchrashuv oʻtkazildi. Muloqot davomida biznes inkubatsiya va akseleratsiya jarayonlarida Vengriya tajribasi, texnopark rezidentlari uchun yaratilgan sharoitlar, mulkchilik shakllari va hamkorlik istiqbollari, texnologiyalar transferi, oʻquv-amaliy laboratoriyalarning texnoparklar rivojlanishidagi oʻrni kabi yoʻnalishlarda savol-javoblar oʻtkazildi va kelgusida hamkorlik bo‘yicha kelishib olindi.
Eslatib oʻtamiz, mazkur xizmat safari Oʻzbekiston Respublikasi Prezidentining 2025-yil 28-iyul kuni Andijon viloyatida islohotlar natijadorligi, hududlarda ishlarning borishi hamda aholini qiynayotgan masalalarga yechim topish boʻyicha amalga oshirilishi lozim boʻlgan ustuvor vazifalar yuzasidan oʻtkazilgan yigʻilishda belgilangan topshiriqlar boʻyicha 39-son bayonda belgilangan ustuvor vazifalar ijrosi yuzasidan tashkil etilgan boʻlib, joriy yilning 5-dekabr sanasiga qadar davom etadi.