Özbekiston Respublikasi Ta’lim va ilm-fan vazirligi huzuridag Innovatsion rivojlaniş agentligi

Innovatsion rivojlanish agentligi tomonidan hududlardagi Innovatsion tuman(shahar)larda yangi ishlanmalarga asoslangan texnologiyalarni joriy etishga qaratilgan ilmiy faoliyatga oid davlat ilmiy dasturlari doirasida tijoratlashtirishga tayyorlash va tijoratlashtirish loyihalari shaklida bir yil va ikki yil mobaynida bajariladigan innovatsion tadqiqotlar tanlovi eʼlon qilinmoqda.

Mazkur tanlovga loyiha talabnomalari Oʻzbekiston Respublikasi Vazirlar Mahkamasining “Ilmiy-tadqiqot va innovatsion faoliyatni rivojlantirishning normativ-huquqiy bazasini yanada takomillashtirish chora-tadbirlari toʻgʻrisida” 2020-yil 9-martdagi 133-son qarorida belgilangan talablarga muvofiq qabul qilinadi.

Tanlovga taqdim etiladigan ilmiy loyihalar ishlanmani tijoratlashtirishga tayyorlash va tijoratlashtirish jarayonlarini muvofiqlashtirish axborot tizimi (keyingi o‘rinlarda – axborot tizimi) (tijorat.ilmiy.uz) orqali 2025-yil 30-sentabrga qadar faqat elektron shaklda qabul qilinadi.

Tijoratlashtirishga tayyorlash shaklidagi loyihani rasmiylashtirish shakli bilan tanishish uchun bu yerni bosing.

Tijoratlashtirish shaklidagi loyihani rasmiylashtirish shakli bilan tanishish uchun bu yerni bosing.

Tanlov shartlari.

1. Tanlovga amaliy tadqiqotlarga va/yoki olingan ixtiro, foydali model patentiga asoslangan loyiha talabnomalari qabul qilinadi.

Ekologik innovatsiyalar va yashil texnologiyalar boʻyicha yangi ishlanmalarga ustuvorlik beriladi.

Amaliy tadqiqotga asoslangan loyihalarni ilmiy faoliyatga oid davlat dasturlari doirasida bajargan oliy taʼlim yoki ilmiy tashkilotlar taqdim etishlari mumkin.

Patentga asoslangan loyihalarni ilmiy va innovatsion faoliyat subyektlari (shu jumladan, innovatsion faoliyatni amalga oshirmoqchi boʻlgan xususiy korxonalar) taqdim etishlari mumkin.

2. Loyiha innovatsion hududga aylantirilayotgan tuman va shaharlarda yangi ishlanmaga asoslangan ishlab chiqarish va/yoki xizmat koʻrsatishni tashkil etishni nazarda tutadi.

Loyiha doirasida ishlab chiqarish va/yoki xizmat koʻrsatishni tegishli hududda tashkil etish uchun loyiha talabnomasiga ushbu tuman yoki shahar hokimi tomonidan loyihani qoʻllab-quvvatlashi va zarur shart-sharoit yaratib berishi bayon etilgan xati ilova qilinadi.

Loyiha talabnomasida ishlab chiqarish va/yoki xizmat koʻrsatishni tashkil qilish uchun zarur yer maydonining mavjudligi aniq manzil va tegishli oʻlchamlar bilan koʻrsatiladi.

3. Tanlovda loyihani moliyalashtirishga xususiy sektor mablagʻini (shu jumladan, tashabbuskorning oʻz mablagʻini) jalb etish boʻyicha kelishuvga erishgan loyihalarga ustuvorlik beriladi.

Xususiy sektor mablagʻlari (yoki tashabbuskorlarning oʻz mablagʻlari) loyiha qiymatining 50 foizdan koʻp boʻlganda inobatga olinadi.

Erishilgan kelishuvni tasdiqlovchi hujjatning elektron nusxasi loyiha talabnomasi bilan birga axborot tizimiga yuklanadi.

Bunda, erishilgan kelishuvda loyihani Agentlik tomonidan moliyalashtirish loyihaga xususiy sektor mablagʻlari (yoki tashabbuskorlarning oʻz mablagʻlari) yoʻnaltirilgandan soʻng boshlanishi inobatga olinishi tavsiya etiladi.

4. Tijoratlashtirishga tayyorlash shaklidagi innovatsion loyiha talabnomasida yangi mahsulotning tajriba namunasini yoki prototipini yaratish nazarda tutiladi va loyihani kelgusida tijoratlashtirish istiqbollari bayon etiladi.

Tijoratlashtirish istiqbollari ishlab chiqarish va/yoki xizmat koʻrsatish tashkil etiladigan hudud, mavjud (yoki rejalashtirilgan) yer maydoni, hamkor tashkilotlar, loyihani moliyalashtirish manbalari toʻgʻrisida maʼlumotlarni bayon etish orqali asoslantiriladi.

Loyiha talabnomasida (shu jumladan xarajatlar smetasida) loyihani tijoratlashtirish bilan bog‘liq ishlar (biznes-rejani ishlab chiqish, litsenziya kelishuvini tuzish, ishlanmaning qiymatini baholash) va xarajatlar koʻrsatiladi.

5. Loyiha rahbari tomonidan tanlovga faqat bitta loyiha taqdim etilishi mumkin. Amalda innovatsion loyiha bajarilayotgan yoki boshqa tanlovlarda koʻrib chiqish jarayonida boʻlgan innovatsion loyiha bilan ishtirok etayotgan loyiha rahbarlarining loyiha talabnomalari qabul qilinmaydi.

6. Loyiha talabnomasini axborot tizimi orqali roʻyxatdan oʻtkazish uchun quyidagi hujjatlarning elektron nusxalari (pdf/doc) platformaga yuklanadi:

• ijrochi tashkilotning rahbari tomonidan imzolangan yoʻllanma xat (pdf);
• tegishli tuman yoki shahar hokimining qoʻllab-quvvatlash xati (pdf);
• patentga asoslangan loyihalar uchun patent yoki litsenzion shartnoma (pdf).

Loyihaga xususiy sektor mablagʻini (shu jumladan, tashabbuskorning oʻz mablagʻini) jalb etgan holda moliyalashtirish nazarda tutilganida moliyalashtiruvchi tomon bilan erishilgan kelishuvning elektron nusxasi ham platformaga yuklanadi.

7. Taqdim etilgan loyihada keltirilgan yangilik, nou-xau va gʻoyalarni ekspertiza jarayonlarida ochiq muhokamaga qoʻyishning maqsadga muvofiqligi toʻgʻrisida ijrochi tashkilot vakolatli tuzilmasining (xizmatining) xulosasi loyihaga ilova qilinishi lozim.

Izoh: Ijrochi tashkilot loyihada keltirilgan yangilik, nou-xau va gʻoyalarni ekspertiza jarayonlarida ochiq muhokamaga qoʻyilganligi haqida vakolatli tuzilmaning (xizmatning) xulosasi taqdim etilmagan taqdirda, loyiha talabnomasi tanlovdan chetlashtiriladi.

8. Loyihalar belgilangan shaklda va loyiha qiymatidan kelib chiqib shakllantirilishi lozim.

9. Loyihaning Agentlik tomonidan moliyalashtiradigan qismi bazaviy hisoblash miqdorining (BHM) quyidagi miqdorlardan oshmaydi:

bir yillik loyihalar boʻyicha – 3 500 barobarigacha

ikki yillik loyihalar boʻyicha – 6 000 barobarigacha.

10. Loyihani bajarish bilan bogʻliq xarajatlar loyiha qiymati doirasida hisoblanadi, bunda:

loyihaning umumiy qiymati bazaviy hisoblash miqdorining (BHM) baravarida koʻrsatiladi;

tanlovga taqdim etiladigan loyihani amalga oshirish uchun soʻralayotgan umumiy moliyalashtirish hajmini (5-shakl) hisoblashda havolaga (tijorat.ilmiy.uz) joylashtirilgan hisob-kitob shaklidan foydalanish tavsiya etiladi;

loyiha ijrochilarining ishtirok etish ulushi (stavka miqdori) ularning loyihadagi vazifasiga mutanosib boʻladi (masalan, loyihaga toʻliq stavkada jalb etilgan ijrochi loyihaga asosiy shtatdagi xodim sifatida rasmiylashtirishni nazarda tutadi va boshqa tashkilotlarda toʻliq stavkada va asosiy ish joyida ishlamaydi).

Eslatma:

1. Oʻzbekiston Respublikasi Vazirlar Mahkamasining “Ilmiy-tadqiqot va innovatsion faoliyatni rivojlantirishning normativ-huquqiy bazasini yanada takomillashtirish chora-tadbirlari toʻgʻrisida” 2020-yil 9-martdagi 133-son qaroriga muvofiq:

loyihalar belgilangan talablarga muvofiq texnik ekspertizadan oʻtkaziladi;

loyiha doirasida ajratilgan mablagʻlar ish haqidan tashqari, umumiy mablagʻning kamida 40 foizi ilmiy asbob-uskunalar, xom ashyolar hamda boshqa zarur materiallarni xarid qilish va moddiy-texnika bazasini rivojlantirish bilan bogʻliq boshqa xarajatlarga yoʻnaltiriladi;

loyiha doirasida bino va inshootlarni qurish, rekonstruksiya qilish va kapital ta’mirlashga hamda transport vositalarini (maxsus transport vositalari bundan mustasno) xarid qilishga yoʻl qoʻyilmaydi.

Tanlovga taqdim etilgan loyihalarning har bir bosqichda koʻrib chiqish natijalari toʻgʻrisidagi maʼlumotlar loyiha rahbarlarining ishlanmani tijoratlashtirishga tayyorlash va tijoratlashtirish jarayonlarini muvofiqlashtirish axborot tizimidagi (tijorat.ilmiy.uz) shaxsiy kabinetlarida koʻrsatiladigan interaktiv xizmati orqali taqdim etib boriladi.

Tanlovga taqdim etiladigan loyihalar loyiha rahbarining yagona identifikatsiya tizimi (id.ilmiy.uz) orqali roʻyxatdan oʻtgan shaxsiy kabineti orqali topshirilishi shart. Loyihaning ijrochilari yoki loyiha rahbari boʻlmagan shaxslar tomonidan taqdim etilgan loyihalar tanlovga qabul qilinmaydi.

2. Qoraqalpogʻiston Respublikasi va viloyatlarda innovatsion hududga aylantirilayotgan tumanlar roʻyxati quyidagi hujjatlar bilan tasdiqlangan:

Oʻzbekiston Respublikasi Prezidentining “Ilmiy va innovatsion faoliyatni rivojlantirish boʻyicha davlat boshqaruvi tizimini takomillashtirish toʻgʻrisida” 2021-yil 1-apreldagi PF-6198-son Farmoniga 3-ilova bilan;

Oʻzbekiston Respublikasi Prezidentining “2022 – 2026-yillarda Oʻzbekiston Respublikasining innovatsion rivojlanish strategiyasini tasdiqlash toʻgʻrisida” 2022-yil 6-iyuldagi PF-165-son Farmoniga 4-ilova bilan.

Loyihalarni shakllantirish bilan bogʻliq masalalar boʻyicha Innovatsion rivojlanish agentligi masʼul xodimi: +99871 203-32-23 (510, 416, 318, 413).