Özbekiston Respublikasi Ta’lim va ilm-fan vazirligi huzuridag Innovatsion rivojlaniş agentligi

Innovatsion rivojlanish agentligi tomonidan ixtirochilik va ratsionalizatorlik bo‘yicha o‘tkaziladigan ko‘rgazmalar doirasida Ixtirochilik va ratsionalizatorlik ko‘rik-tanlovi e’lon qilinmoqda. Mazkur tanlovga arizalar O‘zbekiston Respublikasi Vazirlar Mahkamasining “Ixtirochilik va ratsionalizatorlik faoliyatini qo‘llab-quvvatlash chora-tadbirlari to‘g‘risida” 2022-yil 10-avgustdagi 440-son qarori hamda 2022-yil 1-noyabrdagi 15-son bayonida belgilangan talablarga muvofiq qabul qilinadi.

Tanlovga taqdim etiladigan ishlanmalar ixtirochilik va ratsionalizatorlik ko‘rik-tanlovini o‘tkazish bo‘yicha elektron platforma (ixtiro.ilmiy.uz) orqali 2025-yil 14-sentabrga qadar elektron shaklda qabul qilinadi.

Tanlov shartlari:

1. Tanlovda O‘zbekiston Respublikasining barcha hududlaridan 16 dan 40 yoshgacha bo‘lgan ixtirochi va ratsionalizatorlar qatnashish huquqiga ega.

2. Tanlovda ishtirok etish istagida bo‘lgan iqtidorli yoshlar Platforma (ixtiro.ilmiy.uz) orqali ro‘yxatdan o‘tadi.

3. Tanlovda ishtirok etish istagida bo‘lgan ixtirochilar va ratsionalizatorlar quyidagi talablarga javob berishi lozim:

O‘zbekiston Respublikasining fuqarosi bo‘lishi;

aniq bir ixtiro, foydali model yoki ratsionalizatorlik taklifiga ega bo‘lishi.

4. Tanlovga hududlarda o‘tkazilgan ixtirochilik va ratsionalizatorlik ko‘rgazmalarida ishtirok etgan takliflar bo‘yicha arizalar qabul qilinadi. Bunda, ko‘rgazmada ishtirok etganligini tasdiqlovchi ma’lumot yoki rasm Platformaga alohida hujjat shaklida yuklanadi.

5. Ilgari o‘tkazilgan tanlovlarda ishtirok etgan taklif arizalari Tanlovdan chetlashtiriladi.

6. Tashkilotchilar va homiylik qiluvchi tashkilotlar xodimlarining hamda Komissiya a’zolarining yaqin qarindoshlari Tanlovda ishtirok etish huquqiga ega emas (ular o‘zini o‘zi rad qilgan holatlar bundan mustasno).

7. Tanlov ikki bosqichda o‘tkaziladi:

1-bosqich – Qoraqalpog‘iston Respublikasi, viloyatlar va Toshkent shahri miqyosida tashkil etilgan ko‘rgazmalarda ishtirok etganlar orasidan tanlab olingan eng yaxshi ixtiro, foydali model yoki ratsionalizatorlik takliflar egalari Tanlovning hududiy bosqichi g‘olibi deb topiladi hamda respublika bosqichiga yo‘llanma oladi;

2-bosqich – respublika bosqichida ishtirok etish uchun yo‘llanma olganlar “InnoWeek – 2025” – Innovatsion gʻoyalar xalqaro haftaligi ko‘rgazmasida ishtirok etadi va ular orasidan tanlab olingan 3 nafar eng yaxshi ixtiro, foydali model yoki ratsionalizatorlik takliflar egalari Tanlovning respublika bosqichi g‘olibi deb topiladi.

8. Tanlov natijalari bo‘yicha g‘oliblar Platformada (ixtiro.ilmiy.uz) Respublika komissiyasi a’zolarining ovoz berishi orqali aniqlanadi.

9. Tanlovga taqdim qilingan ixtiro, foydali model yoki ratsionalizatorlik takliflarini baholash quyidagi mezonlar bo‘yicha amalga oshiriladi:

• energiya va resurslarni tejash, zamonaviy texnologiyalar va yangi materiallar yaratish hamda ulardan foydalanish;
• ekologiyaga mosligi (atrof muhitni himoyalash bo‘yicha muammolarni hal qilish);
• mehnat sharoitlarini yaxshilash, insonlar uchun qulaylik yaratish;
• ob’ektni ishlab chiqilish darajasi (foydalanishga tayyorligi: sinov-sanoat yoki dastlabki namuna va b.)
• eksportga mo‘ljallanganligi;
• importning o‘rnini bosishi.
• ixtiro yoki foydali modelga patent olinganligi.

10. Arizalarni Platforma (ixtiro.ilmiy.uz) orqali ro‘yxatdan o‘tkazish jarayonida quyidagi hujjatlarning elektron  nusxalari (pdf/doc) Platformaga yuklanadi:

• ixtiro, foydali model yoki ratsionalizatorlik taklif asosidagi ishlanma fotosurati yoki sxemasi (pdf/jpeg).
•  ixtiro, foydali model yoki ratsionalizatorlik taklif tavsifi matni (imzo qo‘yilgan holda, pdf va uning matn redaktori dasturidagi (doc/docx) shakli);
• taklif tashkilotda/jamoaviy yaratilgan bo‘lsa, taklifning tanlovda ishtiroki bo‘yicha hammualliflarining rozilik xati (pdf);
• patent yoki ratsionalizatorlik taklifi guvohnomasi nusxasi (pdf);
• taklif joriy etilgan bo‘lsa, litsenzion kelishuv shartnomasi nusxasi (pdf)

12. Ixtiro, foydali model yoki ratsionalizatorlik taklifi ma’lumotlari Platformada (ixtiro.ilmiy.uz) tegishli bo‘limlarga kiritilishi lozim.

Izoh: Platformaning (ixtiro.ilmiy.uz) majburiy (*) belgisidagi bo‘limlariga ma’lumotlar kiritilmagan taqdirda, ariza  tanlovga qabul qilinmaydi.

Eslatma:

O‘zbekiston Respublikasi Vazirlar Mahkamasining “Ixtirochilik va ratsionalizatorlik faoliyatini qo‘llab-quvvatlash chora-tadbirlari to‘g‘risida” 2022-yil 10-avgustdagi 440-son qaroriga muvofiq:

ishlanmalar belgilangan talablarga muvofiq texnik ekspertizadan o‘tkaziladi;

Tanlovga taqdim etilgan arizalarning har bir bosqichda ko‘rib chiqish natijalari to‘g‘risidagi ma’lumotlar Platformadagi (ixtiro.ilmiy.uz) shaxsiy kabinetlarida ko‘rsatiladigan interaktiv xizmati orqali taqdim etib boriladi.

Tanlovga loyiha topshirishda ishtirokchi tomonidan quyidagilar:

1. Ilmiy va innovatsion faoliyat bilan shugʻullanuvchi jismoniy shaxslarni identifikatsiya qilish tizimi (id.ilmiy.uz) orqali roʻyxatdan oʻtishi;

2. Identifikatsiya raqami (ScienceID) orqali Platforma (ixtiro.ilmiy.uz)ga kirishi va loyiha talabnomasini shakllantirish lozim.

Ishlanma muallifi bo‘lmagan shaxslar tomonidan taqdim etilgan arizalar tanlovga qabul qilinmaydi.

Arizalarni shakllantirish bilan bog‘liq masalalar bo‘yicha Innovatsion rivojlanish agentligi mas’ul xodimi: +99871 203-32-23 (244, 416).