O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Innovatsion rivojlanish agentligi tomonidan bazalt xomashyosi asosida yangi innovatsion mahsulot va texnologiyalarni yaratish va joriy etish maqsadida ilmiy faoliyatga oid davlat maqsadli dasturi doirasida bajariladigan amaliy tadqiqotlar tanlovi eʼlon qilinmoqda.

Mazkur tanlovga loyiha talabnomalari Oʻzbekiston Respublikasi Vazirlar Mahkamasining “Ilmiy-tadqiqot va innovatsion faoliyatni rivojlantirishning normativ-huquqiy bazasini yanada takomillashtirish chora-tadbirlari toʻgʻrisida” 2020-yil 9-martdagi 133-son qarorida belgilangan talablarga muvofiq “Arxitektura, qurilish, dizayn va shaharsozlik fanlari” hamda “Texnika fanlari” yoʻnalishlari boʻyicha qabul qilinadi.

Tanlovga taqdim etiladigan ilmiy loyihalar davlat ilmiy dasturlarining yagona intellektual elektron platformasi (loyiha.ilmiy.uz) orqali 2025-yil
1-oktabrga qadar faqat elektron shaklda qabul qilinadi.

Tanlov shartlari:

1. Tanlovga bajarilishi ikki va uch yilga moʻljallangan amaliy tadqiqotlar bo‘yicha talabnomalar qabul qilinadi.

2. Loyiha talabnomasiga “Oʻzsanoatqurilishmateriallari” uyushmasining Qurilish materiallari sanoati ilmiy-texnikaviy kengashining xulosasi ilova qilinadi. Bunda, kengashning xulosasi elektron platformaga alohida hujjat shaklida yuklandi.

3. Tanlovda ilmiy-tadqiqotlar oʻtkazish uchun imkoniyati va salohiyati mavjud ilmiy faoliyat subyektlari ishtirok etishi mumkin. Ilmiy faoliyat asosiy faoliyat turiga kirmaydigan tashkilotlar tomonidan taqdim etilgan loyihalar tanlovdan chetlashtiriladi.

4. Loyiha rahbari tomonidan tanlovga faqat bitta loyiha taqdim etilishi mumkin. Agar loyiha rahbari tomonidan amalda ilmiy loyiha bajarilayotgan boʻlsa, bir vaqtning oʻzida bir turdagi ikkita loyihaga rahbar boʻlishiga yoʻl qoʻyilmaydi va ushbu holatga olib kelishi mumkin boʻlgan loyihalar qabul qilinmaydi.

5. Loyiha doirasida bajariladigan tadqiqot yakunida kutiladigan natijani “Oʻzsanoatqurilishmateriallari” uyushmasiga amaliyotda foydalanish uchun taqdim etilishi shart. Ushbu ishlar loyihani asoslashtirishda nazarda tutilmagan taqdirda tanlovdan chetlashtiriladi.

6. Loyiha talabnomasida intellektual mulk obyektlari uchun tegishli hujjatlar olinishi, nufuzli ilmiy jurnallarda va Web of Science hamda Scopus maʼlumotlar bazasida indeksatsiyalangan jurnallarda ilmiy maqolalar chop etilishi nazarda tutilishi kerak.

7. Ilmiy loyiha hujjatlarini Davlat ilmiy dasturlarining yagona intellektual elektron platformasi (lloyiha.ilmiy.uz) orqali roʻyxatdan oʻtkazish jarayonida quyidagi hujjatlarning elektron nusxalari (pdf) Elektron platformaga yuklanadi:

• ijrochi tashkilotning ilmiy (ilmiy-texnik) kengashi qaroridan koʻchirma (pdf);
• Antiplagiat xulosasi (pdf).

8. Taqdim etilgan loyihada keltirilgan ilmiy yangilik, nou-xau va gʻoyalarni ekspertiza jarayonlarida ochiq muhokamaga qoʻyishning maqsadga muvofiqligi toʻgʻrisida ijrochi tashkilot vakolatli tuzilmasining (xizmatining) xulosasi loyihaga ilova qilinishi lozim.

Izoh: Ijrochi tashkilot loyihada keltirilgan ilmiy yangilik, nou-xau va gʻoyalarni ekspertiza jarayonlarida ochiq muhokamaga qoʻyilganligi haqida vakolatli tuzilmaning (xizmatning) xulosasi taqdim etilmagan taqdirda, loyiha talabnomasi tanlovdan chetlashtiriladi.

9. Loyihalar belgilangan tadqiqot shakli, bajarish davri hamda loyiha qiymatlaridan kelib chiqib shakllantirilishi lozim.

10. Loyiha qiymati bajarish davri boʻyicha quyidagi miqdorlardan oshmasligi lozim:

bajarilishi ikki yil boʻlgan loyiha – bazaviy hisoblash miqdorining (BHM) 3 500 barobarigacha;

bajarilishi uch yil boʻlgan loyiha – BHMning 4 500 barobarigacha.

11. Loyihani bajarish bilan bogʻliq xarajatlar loyiha qiymati doirasida bazaviy hisoblash miqdori boʻyicha, bunda:

loyihaning umumiy qiymati bazaviy hisoblash miqdorining (BHM) baravarida koʻrsatiladi;

loyiha qiymatini sunʼiy ravishda oshirishga yoʻl qoʻyilmaydi;

loyiha ishtirokchilarining ishtirok etish ulushi (stavka miqdori) ularning loyihadagi vazifasiga mutanosib boʻladi (masalan, loyihaga toʻliq stavkada jalb etilgan ijrochi loyihaga asosiy shtatdagi xodim sifatida rasmiylashtirishni nazarda tutadi va  boshqa tashkilotlarda toʻliq stavkada va asosiy ish joyida ishlamaydi);

Eslatma:

Oʻzbekiston Respublikasi Vazirlar Mahkamasining “Ilmiy-tadqiqot va innovatsion faoliyatni rivojlantirishning normativ-huquqiy bazasini yanada takomillashtirish chora-tadbirlari toʻgʻrisida” 2020-yil 9-martdagi 133-son qaroriga muvofiq:

loyiha doirasida ajratilgan mablagʻlar ilmiy izlanishlar olib borishga, shuningdek, ish haqidan tashqari, umumiy mablagʻning kamida 40 foizi ilmiy asbob-uskunalar, xom ashyolar hamda boshqa zarur materiallarni xarid qilish va  moddiy-texnika bazasini rivojlantirish bilan bogʻliq boshqa xarajatlarga yoʻnaltiriladi;

loyiha doirasida avtotransport vositalarini xarid qilishga yoʻl qoʻyilmaydi.

Tanlovga taqdim etilgan loyihalarning har bir bosqichda koʻrib chiqish natijalari toʻgʻrisidagi maʼlumotlar loyiha rahbarlarining Davlat ilmiy dasturlarining yagona intellektual elektron platformasidagi (loyiha.ilmiy.uz) shaxsiy kabinetlarida koʻrsatiladigan interaktiv xizmati orqali taqdim etib boriladi.

Tanlovga loyiha topshirishda loyiha rahbari tomonidan quyidagilar:

1. Ilmiy va innovatsion faoliyat bilan shugʻullanuvchi jismoniy shaxslarni identifikatsiya qilish tizimi (id.ilmiy.uz) orqali roʻyxatdan oʻtishi;

2. Identifikatsiya raqami (ScienceID) orqali Platforma (loyiha.ilmiy.uz)ga kirishi va loyiha talabnomasini shakllantirish;

3. Taqdim etiladigan talabnomalar, u faoliyat yuritayotgan tashkilotning ilm-fan va innovatsiyaga masʼul rahbar oʻrinbosari tomonidan Platforma (loyiha.ilmiy.uz) orqali elektron tarzda tasdiqlanishi lozim.

Ilmiy loyihalarni shakllantirish bilan bogʻliq masalalar boʻyicha Innovatsion rivojlanish agentligi masʼul xodimi: +99871 203-32-23 (416, 116, 537).