O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Innovatsion rivojlanish agentligi tomonidan “Ekologik innovatsiyalar va yashil texnologiyalar” tijoratlashtirishga tayyor innovatsion ishlanmalar va loyihalar” tanlovi (keyingi oʻrinlarda – tanlov) eʼlon qilinmoqda.

Mazkur tanlovga arizalar “Ekologik innovatsiyalar va yashil texnologiyalar” tijoratlashtirishga tayyor innovatsion ishlanmalar va loyihalar” tanlovini oʻtkazish tartibi toʻgʻrisida nizom talablariga muvofiq qabul qilinadi.

Tanlovga taqdim etiladigan arizalar innovatsion mahsulotlar, texnologiyalar koʻrgazmasi va savdosini tashkil etishga moʻljallangan (innomarket.uz) axborot tizimi (keyingi oʻrinlarda — axborot tizim) orqali 2026-yil 15-oktabr soat 23:59 ga qadar kelib tushgan tegishli yo‘nalish bo‘yicha loyihalar elektron shaklda qabul qilinadi.

Tanlovning muhim shartlari.

1. Tanlovda Oʻzbekiston Respublikasida ilmiy-tadqiqot, innovatsion, texnologik, ishlab chiqarish yoki tadbirkorlik faoliyati bilan shug‘ullanib kelayotgan jismoniy va yuridik shaxs ishtirok etishi mumkin.

2. Tanlovda ishtirok etish istagida boʻlgan talabgorlar axborot tizimi orqali ekologik innovatsiyalar va yashil texnologiyalar yoʻnalishini tanlagan holda roʻyxatdan oʻtadi.

3. Ilgari oʻtkazilgan mazkur tanlovlarda ishtirok etganlar aynan shu loyihalari bilan tanlovda ishtirok etmaydi.

4. Agar tanlov komissiyasi aʼzosi ishtirokchi(lar)ning yaqin qarindoshi boʻlsa yoki tanlov natijasidan bevosita manfaatdor boʻlsa yoxud uning xolisligiga shubha tugʻdiruvchi boshqa holatlar mavjud boʻlsa, aʼzo oʻzini oʻzi rad etishi shart.

5. Tanlov ikki bosqichda oʻtkaziladi:

1-bosqich – 2026-yil 15-oktabr soat 23:59 ga qadar axborot tizimiga tegishli yo‘nalish bo‘yicha ariza topshirish;

2-bosqich – ariza mualliflari taqdimotini o‘tkazish.

6. Tanlov natijalari boʻyicha gʻoliblar axborot tizimda tanlov komissiyasi aʼzolarining baholash natijalari orqali aniqlanadi.

7. Arizalarni axborot tizimi orqali roʻyxatdan oʻtkazish jarayonida quyidagi hujjatlarning elektron nusxalari yuklanadi:

• mahsulot (yangi texnik yechim) nomi;
• mahsulot tavsifi;

• mahsulot turi;
• ishlanma muallifining faoliyat yuritayotgan tashkiloti;
• intellektual mulk obyekti muhofazasi hujjatlari;
• investitsiya zarurati;
• loyiha turi;
• tegishli soha va tarmoqlarning qaysi muammolariga yechim boʻlishi;
• loyiha doirasidagi mahsulot rasmlari;
• mahsulotning taxminiy narxi.

8. Ariza maʼlumotlari axborot tizimda tegishli yo‘nalishga kiritilishi lozim.

Izoh: Axborot tizimning (innomarket.uz) majburiy (*) belgisidagi boʻlimlariga noto‘g‘ri maʼlumotlar kiritilgan taqdirda, ariza  tanlovga qabul qilinmaydi.

Eslatma:

“Ekologik innovatsiyalar va yashil texnologiyalar” tijoratlashtirishga tayyor innovatsion ishlanmalar va loyihalar” tanlovini oʻtkazish tartibi toʻgʻrisida nizom talablariga muvofiq:

arizalar belgilangan talablarga muvofiq texnik ekspertizadan oʻtkaziladi;

Tanlovga taqdim etilgan arizalarning birinchi bosqichi koʻrib chiqish natijalari toʻgʻrisidagi maʼlumotlar axborot tizimdagi shaxsiy kabinetlarida koʻrsatiladigan interaktiv xizmati orqali taqdim etib boriladi.

Tanlovga taqdim etiladigan arizalar ishtirokchining Ilmiy-innovatsion faoliyat bilan shugʻullanuvchi jismoniy shaxslarni identifikatsiya tizimi (id.ilmiy.uz) orqali roʻyxatdan oʻtgan shaxsiy kabineti orqali topshirilishi shart. Taklifning muallifi boʻlmagan shaxslar tomonidan taqdim etilgan arizalar tanlovga qabul qilinmaydi.

Arizalarni shakllantirish bilan bogʻliq masalalar boʻyicha Innovatsion rivojlanish agentligi masʼul xodimi: +99871 203-32-23 (520).