O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

“InnoPro” amaliy tadqiqot loyihalari tanlovi

Oʻzbekiston Respublikasi Prezidentining “Namangan davlat texnika universitetini tashkil etish toʻgʻrisida” 2025-yil 24-yanvardagi PQ-23-son, “Davlat tilini yanada rivojlantirishga oid qoʻshimcha chora-tadbirlar toʻgʻrisida” 2025-yil 20-oktabrdagi
PQ-308-son, “Oʻzbekiston davlat sport akademiyasi faoliyatini tashkil qilish chora-tadbirlari toʻgʻrisida” 2024-yil 28-maydagi PQ-197-son hamda Vazirlar Mahkamasining “Surxondaryo va Sirdaryo viloyatlarida shamol eroziyasining salbiy taʼsirini kamaytirish va ekologik vaziyatni yaxshilash boʻyicha chora-tadbirlar dasturini tasdiqlash toʻgʻrisida” 2026-yil 31-martdagi 135-son va “Oʻzbekiston Respublikasi Vazirlar Mahkamasi huzuridagi Imom Moturidiy xalqaro ilmiy-tadqiqot markazining faoliyatini takomillashtirish chora-tadbirlari toʻgʻrisida” 2025-yil 15-sentabrdagi 583-son qarorlarida bayon etilgan vazifa va topshiriqlarda belgilangan vazifalarni bajarilishida ilmiy yechimlarni ishlab chiqish uchun Ilmiy faoliyatga oid davlat maqsadli dasturlari doirasida bajariladigan amaliy tadqiqotlar tanlovi eʼlon qilinmoqda.

Tanlovga kelib tushgan loyihalar Oʻzbekiston Respublikasi Vazirlar Mahkamasining “Ilmiy-tadqiqot va innovatsion faoliyatni rivojlantirishning normativ-huquqiy bazasini yanada takomillashtirish chora-tadbirlari toʻgʻrisida” 2020-yil 9-martdagi 133-son qarorda belgilangan talablarga muvofiq quyidagi fan yoʻnalishlari boʻyicha eʼlon qilinadi:

1. Ekologiya, atrof-muhit muhofazasi va iqlim oʻzgarishi fanlari
2. Filologiya va ijtimoiy fanlar
3. Huquq fanlari
4. Pedagogika va psixologiya fanlari
5. Qishloq xoʻjaligi fanlari
6. Tarix va arxeologiya fanlari
7. Kimyo fanlari, kimyoviy texnologiyalar va nanotexnologiyalar

Loyiha taqdim qilinganda loyiha rahbari oʻz loyihasi tadqiqot yoʻnalishidan kelib chiqib Oliy taʼlim, fan va innovatsiyalar vazirligi huzuridagi Ilmiy-texnik kengash yoʻnalishini tanlashi va shu yoʻnalish boʻyicha taqdim qilishi lozim.

Tanlovga taqdim etiladigan ilmiy loyihalar davlat ilmiy dasturlarining yagona intellektual elektron platformasi (loyiha.ilmiy.uz) orqali 2026-yil 15-maydan 2026-yil 15-iyun soat 23:55 ga qadar faqat elektron shaklda qabul qilinadi.

Tanlov shartlari.

1. Tanlovda ilmiy-tadqiqotlar oʻtkazish uchun imkoniyati va salohiyati mavjud ilmiy faoliyat subyektlari ishtirok etishi mumkin.

2. Loyiha rahbari tomonidan tanlovga faqat bitta loyiha taqdim etilishi mumkin.

3. Amaliy tadqiqot loyihalari boʻyicha ijrochi tashkilot Ilmiy (ilmiy-texnik) kengashi majlisining bayonidan koʻchirmada va bajarilishi rejalashtirilgan ilmiy loyiha yakunida qoʻlga kiritiladigan muhim ilmiy natija (yakuniy mahsulot, yangi ishlanma, texnologiya) qayd etilishi (asoslab berilishi) lozim.

4. Tanlovga bajarish muddatlari 2 yilgacha boʻlgan loyihalar qabul qilinadi.

5. Loyihani amalga oshirish boʻyicha ilmiy jamoaning oʻrtacha yoshi, qoida tariqasida 45 yoshdan oshmasligi kerak. (Ilmiy jamoaning oʻrtacha yoshi barcha ijrochilarning yoshini oʻrtacha arifmetik qiymati sifatida hisoblanadi).

6. Eʼlon qilingan mavzularga taqdim etiladigan ilmiy loyihalar tegishli vazirlik va idoralarning qoʻllab-quvvatlash xati mavjud boʻlganida qabul qilinadi.

7. Ilmiy loyiha maʼlumotlari Davlat ilmiy dasturlarining yagona intellektual elektron platformasi (loyiha.ilmiy.uz) orqali davlat tilida (lotin alifbosiga asoslangan oʻzbek yozuvida) kiritiladi va ijrochi tashkilotning masʼul rahbari tomonidan tasdiqlanadi.

8. Tanlovga taqdim etiladigan ilmiy loyihalar yakunida axborot tizimini ishlab chiqish, kompleks foydalanishga asoslangan dasturiy mahsulotlar, veb platformalar, mobil ilovalar yaratishga qaratilgan boʻlsa quyidagilar talab qilinadi:

yaratiladigan dasturiy mahsulot uchun Adliya vazirligi huzuridagi Intellektual mulk agentligidan oʻrnatilgan tartibda roʻyxatdan oʻtkazish va EHM uchun yaratilgan dastur guvohnomasini olish vazifasi loyiha talabnomasida aks etishi;

dasturiy mahsulotning loyiha yakunlangandan soʻng, uzluksiz ishlashi va zarur hollarda maʼlumotlarni yangilab borish;

loyiha talabnomasida kamida uch yillik “hosting” va “domen” (mobil ilova boʻlsa, mobil ilovalar doʻkoniga joylashtirish) xarajatlarini “loyihaning boshqa shu kabi xarajatlar” bandiga kiritish.

Eslatma: Tanlovga taqdim etilgan loyihalarning har bir bosqichda koʻrib chiqish natijalari toʻgʻrisidagi maʼlumotlar loyiha rahbarlarining Davlat ilmiy dasturlarining yagona intellektual elektron platformasidagi (loyiha.ilmiy.uz) shaxsiy kabinetlarida taqdim etib boriladi.

Tanlovga taqdim etiladigan loyiha talabnomalari faqat ilmiy va innovatsion faoliyat bilan shugʻullanuvchi (ScienceID) identifikatsiyasiga ega foydalanuvchilar tomonidan davlat ilmiy dasturlarining yagona intellektual elektron platformasi (loyiha.ilmiy.uz) orqali  qabul qilinadi. “ScienceID” dan roʻyxatdan oʻtish id.ilmiy.uz tizimi orqali amalga oshiriladi. Loyihaning ijrochilari yoki loyiha rahbari boʻlmagan shaxslar tomonidan taqdim etilgan, ijrochi tashkilot rahbarining masʼul oʻrinbosari tomonidan tasdiqlanmagan loyiha talabnomalari tanlovga qabul qilinmaydi.

Ilmiy loyihalarni shakllantirish bilan bogʻliq masalalar boʻyicha Innovatsion rivojlanish agentligi masʼul xodimlari: +99871 203-32-23 (247, 219, 211, 413, 425, 246).

“InnoPro” amaliy tadqiqotlar tanlovi uchun mavzular

ROʻYXATI

1. “Ekologiya va atrof-muhitni muhofaza qilish fanlari” yoʻnalishi boʻyicha:

1.1. Afgʻon shamoli vaqtida mahalliy aholini, ayniqsa, maktab va maktabgacha taʼlim tashkilotlarida bolalarning chang boʻronlarining salbiy taʼsirlaridan himoya qilish maqsadida sinf va mashgʻulot xonalaridagi havo sifatini yaxshilash.

2. “Filologiya va ijtimoiy fanlar” yoʻnalishi boʻyicha:

2.1. Mamlakatimizda istiqomat qilayotgan barcha millat va elatlar vakillariga davlat tilini oʻrgatishga moʻljallangan oʻquv-metodik qoʻllanmalar, koʻrgazmali materiallar yaratish.

3. “Huquq fanlari” yoʻnalishi boʻyicha:

3.1. Shaxslarning davlat chegarasi va chegaraoldi hududlariga kirish, boʻlish hamda faoliyat yuritishga oid murojaatlarni koʻrib chiqish jarayonlarini raqamlashtirish;

3.2. Jinoyat protsessida voyaga yetmagan jabrlanuvchilarning huquqlarini himoya qilishga qaratilgan interaktiv elektron platformani yaratish;

3.3. Anticor.Track: huquqni muhofaza qiluvchi organlarda korrupsiyaviy
xavf-xatarlarni barvaqt aniqlash, oldini olish va shaffoflikni taʼminlashga qaratilgan jamoatchilik nazoratining innovatsion platformasini yaratish.

4. “Pedagogika va psixologiya fanlari” yoʻnalishi boʻyicha:

4.1. Olimpiya va paralimpiya sport turlarida yuqori natijaga erishish uchun virtual reallik (VR) va simulyatsion trening texnologiyalarini joriy etish;

4.2. Sportchilarning ovqatlanish, uyqu va tiklanish jarayonlarini monitoring qilish boʻyicha intellektual mobil platforma ishlab chiqish;

4.3. Yosh sportchilarni saralashda genetik, psixofiziologik va funksional koʻrsatkichlarga asoslangan kompleks seleksiya tizimini yaratish;

4.4. Oʻzbekiston iqlim sharoitida yuqori malakali sportchilarning issiqlikka moslashuvi va tiklanish texnologiyalarini takomillashtirish;

4.5. Oʻzbekiston sportchilarida sunʼiy intellekt asosida individual mashgʻulot yuklamalarini boshqarish tizimini ishlab chiqish.

5. “Qishloq xoʻjaligi” fanlari yoʻnalishi boʻyicha:

5.1. Orolboʻyi tuproq-iqlim sharoitiga mos oʻsimliklar resurslarining tabiiy Milliy bazasini yaratish;

5.2. Issiqxonalarda tomchilatib sugʻorish uchun koʻchma sugʻorish suv inshooti konstruksiyasi va sunʼiy intellektli adaptiv boshqaruv modelini ishlab chiqish.

6. “Tarix va arxeologiya fanlari” yoʻnalishi boʻyicha:

6.1. Yoshlar orasida ekstremizm va radikalizm profilaktikasi hamda mutaassib shaxslarni reablitatsiya qilishning ilmiy-uslubiy asoslarini yaratish;

6.2. Moturidiylikka oid qoʻlyozma merosni kataloglashtirish hamda raqamli reyestrni yaratish.

7. “Kimyo fanlari, kimyoviy texnologiyalar va nanotexnologiyalar” yoʻnalishi boʻyicha:

7.1. Gidroksipropilmetilsellyuloza asosida yuqori boʻkuvchan gidrogellar olish texnologiyasini ishlab chiqish va amaliyotga qoʻllash.