O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Oʻzbekiston Respublikasi Prezidentining, Oʻzbekiston Respublikasi Oliy Majlisi va Vazirlar Mahkamasining hujjatlari, davlat dasturlari va konsepsiyalarda bayon etilgan vazifa va topshiriqlarda belgilangan vazifalarni bajarilishida ilmiy yechimlarni ishlab chiqish uchun Ilmiy faoliyatga oid davlat maqsadli dasturlari doirasida bajariladigan amaliy tadqiqotlar tanlovi eʼlon qilinmoqda.

Tanlovga kelib tushgan loyihalar Oʻzbekiston Respublikasi Vazirlar Mahkamasining “Ilmiy-tadqiqot va innovatsion faoliyatni rivojlantirishning normativ-huquqiy bazasini yanada takomillashtirish chora-tadbirlari toʻgʻrisida” 2020-yil 9-martdagi 133-son qarorida belgilangan talablarga muvofiq quyidagi fan yoʻnalishlari boʻyicha eʼlon qilinadi:

1. Arxitektura, qurilish, dizayn va shaharsozlik fanlari
2. Ekologiya, atrof-muhit muhofazasi va iqlim oʻzgarishi fanlari
3. Filologiya va ijtimoiy fanlar
4. Huquq fanlari
5. Qishloq xoʻjaligi fanlari
6. Tarix va arxeologiya fanlari
7. Texnika fanlari

Loyiha taqdim qilinganda loyiha rahbari oʻz loyihasi tadqiqot yoʻnalishidan kelib chiqib Oliy taʼlim, fan va innovatsiyalar vazirligi huzuridagi Ilmiy-texnik kengash yoʻnalishini tanlashi va shu yoʻnalish boʻyicha taqdim qilishi lozim.

Tanlovga taqdim etiladigan ilmiy loyihalar davlat ilmiy dasturlarining yagona intellektual elektron platformasi (loyiha.ilmiy.uz) orqali 2026-yil 20-martdan 2026-yil 20-aprel soat 23:55 ga qadar faqat elektron shaklda qabul qilinadi.

Tanlov shartlari.

1. Tanlovda ilmiy-tadqiqotlar oʻtkazish uchun imkoniyati va salohiyati mavjud ilmiy faoliyat subyektlari ishtirok etishi mumkin.

2. Loyiha rahbari tomonidan tanlovga faqat bitta loyiha taqdim etilishi mumkin.

3. Amaliy tadqiqot loyihalari boʻyicha ijrochi tashkilot Ilmiy (ilmiy-texnik) kengashi majlisining bayonidan koʻchirmada va bajarilishi rejalashtirilgan ilmiy loyiha yakunida qoʻlga kiritiladigan muhim ilmiy natija (yakuniy mahsulot, yangi ishlanma, texnologiya) qayd etilishi (asoslab berilishi) lozim.

4. Tanlovga bajarish muddatlari 3 yilgacha boʻlgan loyihalar qabul qilinadi.

5. Loyihani amalga oshirish boʻyicha ilmiy jamoaning oʻrtacha yoshi, qoida tariqasida 45 yoshdan oshmasligi kerak. (Ilmiy jamoaning oʻrtacha yoshi barcha ijrochilarning yoshini oʻrtacha arifmetik qiymati sifatida hisoblanadi).

6. Eʼlon qilingan mavzularga taqdim etiladigan ilmiy loyihalar tegishli vazirlik va idoralarning qoʻllab-quvvatlash xati mavjud boʻlganida qabul qilinadi.

7. Ilmiy loyiha maʼlumotlari Davlat ilmiy dasturlarining yagona intellektual elektron platformasi (loyiha.ilmiy.uz) orqali davlat tilida (lotin alifbosiga asoslangan oʻzbek yozuvida) kiritiladi va ijrochi tashkilotning masʼul rahbari tomonidan tasdiqlanadi.

8. Tanlovga taqdim etiladigan ilmiy loyihalar yakunida axborot tizimini ishlab chiqish, kompleks foydalanishga asoslangan dasturiy mahsulotlar, veb platformalar, mobil ilovalar yaratishga qaratilgan boʻlsa quyidagilar talab qilinadi:

yaratiladigan dasturiy mahsulot uchun Adliya vazirligi huzuridagi Intellektual mulk agentligidan oʻrnatilgan tartibda roʻyxatdan oʻtkazish va EHM uchun yaratilgan dastur guvohnomasini olish vazifasi loyiha talabnomasida aks etishi;

dasturiy mahsulotning loyiha yakunlangandan soʻng, uzluksiz ishlashi va zarur hollarda maʼlumotlarni yangilab borish;

loyiha talabnomasida kamida uch yillik “hosting” va “domen” (mobil ilova boʻlsa, mobil ilovalar doʻkoniga joylashtirish) xarajatlarini “loyihaning boshqa shu kabi xarajatlar” bandiga kiritish.

Eslatma: Tanlovga taqdim etilgan loyihalarning har bir bosqichda koʻrib chiqish natijalari toʻgʻrisidagi maʼlumotlar loyiha rahbarlarining Davlat ilmiy dasturlarining yagona intellektual elektron platformasidagi (loyiha.ilmiy.uz) shaxsiy kabinetlarida taqdim etib boriladi.

Tanlovga taqdim etiladigan loyiha talabnomalari faqat ilmiy va innovatsion faoliyat bilan shugʻullanuvchi (ScienceID) identifikatsiyasiga ega foydalanuvchilar tomonidan davlat ilmiy dasturlarining yagona intellektual elektron platformasi (loyiha.ilmiy.uz) orqali  qabul qilinadi. “ScienceID” dan roʻyxatdan oʻtish id.ilmiy.uz tizimi orqali amalga oshiriladi. Loyihaning ijrochilari yoki loyiha rahbari boʻlmagan shaxslar tomonidan taqdim etilgan, ijrochi tashkilot rahbarining masʼul oʻrinbosari tomonidan tasdiqlanmagan loyiha talabnomalari tanlovga qabul qilinmaydi.

Ilmiy loyihalarni shakllantirish bilan bogʻliq masalalar boʻyicha Innovatsion rivojlanish agentligi masʼul xodimlari: +99871 203-32-23 (211, 219, 413, 425, 246).

“Milliy tadqiqot” amaliy tadqiqotlar tanlovi uchun mavzular ROʻYXATI

1. “Arxitektura, qurilish, dizayn va shaharsozlik fanlari” yoʻnalishi boʻyicha:

1.1. Seysmik faol hududlarda bino va inshootlarni loyihalash boʻyicha milliy normativ hujjatlarni Yevropa standartlari bilan integratsiyalashning ilmiy-texnik asoslarini ishlab chiqish.

2. “Ekologiya, atrof-muhit muhofazasi va iqlim oʻzgarishi” yoʻnalishi boʻyicha:

2.1. DNK marker texnologiyasidan foydalanib abiotik va biotik stress omillarga chidamli hamda dorivorlik xususiyatlari yuqori boʻlgan malina (Rubus idaeus L.) ning yuqori hosildor yangi F1 duragaylarini yaratish;

2.2. Orolboʻyi hududidagi koʻllar va qamishzorlar dinamikasini sunʼiy yoʻldosh maʼlumotlari asosida baholash mexanizmini ishlab chiqish;

2.3. Orol dengizi qurigan tubida oʻrmon oʻsimliklarini yetishtirishning agrotexnologiyasini takomillashtirish;

2.4. He-Ne (geliy-neon) lazer qurilmasidan foydalanib saksovul (Haloxylonaphyllum) urugʻlarining nurlanish orqali unib chiqish qobiliyatini va koʻchatlarning oʻsishini tezlashtirish agrotexnikasini ishlab chiqish;

2.5. Orol dengizi qurigan tubida tabiiy agroruda asosidagi kapsulalarda granulalashtirilgan choʻl oʻsimliklaridan ihota oʻrmon barpo etish texnologiyasini joriy etish.

3. “Filologiya va ijtimoiy fanlar” yoʻnalishi boʻyicha:

3.1. “Men Oʻzbekistonda yashayapman” – yoshlarning fuqarolik birdamligi va xorijdagi vatandoshlar bilan aloqa laboratoriyasini yaratish

4. “Huquq fanlari” yoʻnalishi boʻyicha:

4.1. Yangi Konstitutsiyaviy prinsiplarni davlat organlari faoliyati va huquqni qoʻllash amaliyotida faol qoʻllash hamda uning samaradorligini baholash boʻyicha kompleks metodika ishlab chiqish;

4.2. Oʻzbekiston Respublikasi Konstitutsiyasining 51-moddasida mustahkamlangan akademik erkinlik institutining konstitutsiyaviy-huquqiy mazmuni va amalga oshirish mexanizmlarini ishlab chiqish;

4.3. Raqamli muhitda inson huquqlari va sunʼiy intellekt etikasi boʻyicha innovatsion ta’lim texnologiyalarini yaratish.

5. “Qishloq xoʻjaligi” fanlari yoʻnalishi boʻyicha:

5.1. Oʻzbekistonning turli hududlarida Rosa canina L. oʻsimligida uchraydigan viruslarni aniqlash, tezkor molekulyar diagnostika PSR test tizimini ishlab chiqish va amaliyotga joriy etish.

6. “Tarix va arxeologiya fanlari” yoʻnalishi boʻyicha:

6.1. Temuriylar davri manbalari elektron platformasini yaratish.

7. “Texnika fanlari” yoʻnalishi boʻyicha:

7.1. 3U formatidan kichik boʻlmagan sunʼiy yoʻldoshlar uchun  innovatsion “Attitude Determination and Control System – ADCS”ni ishlab chiqish hamda Yer orbitasida sinovdan oʻtkazish (qayta eʼlon);

7.2. Mahalliy ikkilamchi xomashyolar (sanoat va qurilish chiqindilari) asosida yuqori samarali quruq qurilish qorishmalarini ishlab chiqish texnologiyasini yaratish.