Buxoro viloyati hokimligi

Qoraqalpogʻiston delegatsiyasi tarkibida Kambagʻallikni qisqartirish va bandlik vaziri, Markaziy bankning Qoraqalpogʻiston Respublikasi bosh boshqarmasi boshligʻining oʻrinbosari, “Qoraqalpoq dehqon bozori” respublika uyushmasi raisi, Davlat soliq boshqarmasi boshligʻi, Qoraqalpogʻiston Respublikasi Iqtisodiyot va moliya vazirligi boʻlim boshligʻi, Savdo-sanoat palatasi Qoraqalpogʻiston Respublikasi hududiy boshqarmasi boshligʻi kabi mutasaddilar bor. 
 

Mehmonlar Kogon tumanidagi “Tutkunda” mahallasidagi tadbirkorlik subyektlari, xususan, faoliyat boshlaganiga koʻp boʻlmagan goʻshtni qayta ishlash sexini borib koʻrdilar. 
 

Jomard, Shexon, Tutkunda, Kaptarxona qishloqlarini oʻzida jamlagan “Tutkunda” MFYda jami 5 mingdan ziyod aholi yashayotgan boʻlsa, mahalla “drayveri”, yaʼni “oʻsish nuqtalari” sifatida tomorqa, issiqxona xoʻjaligi va parrandachilik tarmoqlari rivojlanmoqda. Hududda qurilish materiallari, pardozbop gʻisht, bruschatka ishlab chiqarish, bugʻdoyni qayta ishlash korxonalari bilan birga aholiga savdo va xizmat koʻrsatish shaxobchalari faoliyat yuritmoqda. 
 

Aynan Tutkundada loyiha qiymati 15 milliard soʻm boʻlgan, kuniga 1 tonna goʻshtni qayta ishlab, kolbasa mahsulotlari ishlab chiqaruvchi “Negboy ota” MCHJ oʻz faoliyatini boshlaganiga ikki oy toʻlmoqda. 
 

Mazkur korxona zamonaviy texnologiyalar asosida jihozlangan boʻlib, uning yillik ishlab chiqarish quvvati 10 milliard soʻmni tashkil etadi. Korxonada 30 dan ortiq yangi ish oʻrni yaratilgan boʻlib, bu hudud aholisining bandligini taʼminlashda baholiqudrat hissa qoʻshmoqda.
 

Shuningdek, Kogon tumanida metall mahsulotlarini qayta ishlash, neft-gaz burgʻulash korxonalariga zarur asbob-uskuna, butlovchi ehtiyot qismlar ishlab chiqarish xamda xizmat koʻrsatishga ixtisoslashgan “Kogon Mars Plyus” MCHJ  korxonasi faoliyati yaqindan oʻrganildi. 
 

“Tutkunda” MFY, Shexon qishlogʻida joylashgan korxona 2009-yildan buyon faoliyat koʻrsatib kelmoqda. Ayni kunda MCHJ ga zarur oʻttizdan oshiq uskuna va jihozlar Xitoy davlatidan olib kelib oʻrnatilgan. Bunda mahalliy yoshlardan 54 nafar ishchi-mutaxassis bandligi taʼminlangan boʻlib, ular tomonidan yiliga 37 milliard soʻmlik qiymatdagi sanoat mahsulotlari ishlab chiqarilmoqda. Bu bilan byudjetga yiliga oʻrtacha 1,5-2 milliard soʻmgacha tushum kirim qilinmoqda. 
 

Korxona imkoniyatlari va ishlab chiqarish quvvatini oshirish maqsadida uning  taʼsischisi Sayyot Qosimov tomonidan hozirda ishchi oʻrnini 120 nafarga yetkazish, albatta, sexlarda tayyorlanadigan mahsulot salmogʻini 50 milliard soʻmga yetkazish chora-tadbiri koʻrilmoqda. 
 

Bundan tashqari, “Buxoro sanoatni rivojlantirish kompleksi” maxsus sanoat parkida “Silk Road Innovation Group” masʼuliyati cheklangan jamiyat shaklidagi xorijiy korxona tomonidan “AQUATON” innovatsion gidroizolyatsion polotno ishlab chiqarish loyihasi roʻyobga chiqarilmoqda. 
 

Umumiy qiymati 2,4 million AQSH dollariga tengg mazkur loyiha xitoylik investor Yura Zang tomonidan amalga oshirilayotgan boʻlib, dastlabki bosqichda 35 ta yangi ish oʻrni yaratilgan. “AQUATON” innovatsion gidroizolyasion polotno — bu innovatsion material boʻlib, suvni ushlab turish va oqishning oldini olish uchun zarur boʻlgan zichlik va elastiklik xususiyatlariga ega. Bu material tuproqli va baland joylarda suv chiqishini kamaytirish uchun ishlatiladi.
 

Xuddi shunday, “Silk road inovation”  MCHJ ning tosh gilam ishlab chiqarish loyihasi qoraqalpogʻistonlik mutasaddilar eʼtiboridan chetda qolmadi. Mazkur loyiha quvvati—yiliga 600 ming kvadrat metr hajmdagi gidroizol ishlab chiqarilmoqda. Bu degani, yiliga 50 milliard soʻmlik sanoat mahsuloti ishlab chiqarish imkoniyati yaratilgan. 
 

Qoraqalpogʻiston delegatsiyasinig keyingi manzili "CHINA XIANGYANG GROUP So Ltd" xorijiy korxonasi boʻldi. Mazkur tadbirkorlik loyihasi umumiy qiymati 15 million AQSH dollariga teng boʻlib, yiliga 16 ming 800 tonna hajmidagi gofra karton qogʻozi ishlab chiqarish quvvatiga ega. Hozirda 15 ta ish oʻrni yaratilgan korxonada yiliga 220 milliard soʻm qiymatidagi sanoat mahsulotlari ishlab chiqarilmoqda.