Kogon: “Kogon Zarafshon jayroni” fermer xoʻjaligida naslli chorva soni 200 boshga yetkazildi
2025-10-06 16:10:00 / Yangiliklar
Jumladan, Kogon tumanining “Yangi hayot” MFY da joylashgan "Par Ravshan trans" MCHJ ham ayni soha rivojiga salmoqli hissa qoʻshayotgan tadbirkorlik subyektlari sirasidandir. Oʻtgan yili korxona tomonidan Estoniya davlatidan 100 bosh "golshteyn" zotli qoramol keltirilgan boʻlsa, shu yil boshida yana 110 bosh zotdor qoramol keltirilgan. Tadbirkor mazkur tarmoqda oʻziga xos “zanjir” tashkil etgan boʻlib, chorva kopmleksida soatiga 2 tonna sutni qayta ishlash orqali aholiga toza va sifatli sut yetkazib berilmoqda.
Xuddi shunday, “Kogon Zarafshon jayroni” fermer xoʻjaligi uzoq yillardan buyon paxtachilik va gʻallachilik tarmoqlarida moʻl hosil yetishtirib kelayotgani barobarida chorvachilikda ham katta tajribaga ega boʻlmoqda.
Ayni kunda xoʻjalik 200 boshdan ortiq xorijiy hamda mahalliy nasldor chorva mollarini sut va goʻsht yoʻnalishida boqib, yaxshigina samaraga erishmoqda. “Kogon Zarafshon jayroni” fermer xoʻjaligi joriy yil sentyabr oyida Estoniya davlatidan jami 32 bosh nasldor “golshteyn” qoramollaridan sotib olib keltirib, faoliyatini yanada kengaytirdi. Albatta, qoramol soni koʻpaygani ortidan, sut va goʻsht mahsulotlari mahsuldorligi oshishida ham muhim omil boʻlib xizmat qilmoqda.
Muhimi, agrar tarmoq rivoji ortidan mazkur xoʻjaliklarda oʻnga yaqin oilaning farovonligi ham taʼminlanmoqda. Shu boisdan moʻjaz fermalarda qoramol parvarishi, sut sogʻib olish, sigir-buzoqlarni maxsus ratsion asosida oziqlantirib, kasalliklardan asrash uchun emlash ishlari talab darajasida, veterinariya tartib-qoidalari asosida olib borilmoqda.
Viloyat hokimligi matbuot xizmati