Buxoro viloyati hokimligi

Viloyat hokimining birinchi oʻrinbosari Botir Ahmedov hamrohligida oʻrganilgan dastlabki manzil “Amu-Qorakoʻl” kanali qirgʻoqboʻyida barpo etilayotgan “Sohil boʻyi” saylgohi boʻldi. Mazkur loyiha doirasida tumanda zamonaviy savdo, xizmat koʻrsatish va koʻngilochar maskanlarni tashkil etish ishlari jadal surʼatlar bilan olib borilmoqda. Hududda hademay 30 tadan ortiq tadbirkorlik subyekti faoliyat boshlaydi, hozirda 14 ta obyektda qurilish ishlari boshlangan. 

Keyingi manzil “Eski qalʼa” MFY da, “Dehqon bozori” oldidan oʻtuvchi avtomobil yoʻlida bunyod etilayotgan yer osti yoʻlagi boʻldi. Ushbu tunnel qurilishi nafaqat yoʻl-transport qatnovini yengillashtiradi, balki piyodalar xavfsizligini taʼminlashda muhim ahamiyatga ega. Ayni paytda qurilish yakuniy bosqichga kirgan, loyiha toʻliq foydalanishga topshirilgach, aholi va haydovchilar uchun katta qulaylik yaratadi.

Shuningdek, Hisob palatasi raisining birinchi o'rinbosari “Tashabbus” MFY dagi “Eko bogʻ” hamda “Abituriyentlar markazi” loyihalari bilan ham tanishdi. Umumiy qiymati 35 milliard soʻm boʻlgan ushbu loyiha doirasida 50 ta inshoot qurilishi koʻzda tutilgan boʻlib, natijada 180 nafardan ortiq yangi ish oʻrni yaratilmoqda. 

— Bu kabi amalga oshirilayotgan bunyodkorliklar aholining hayot sifatini oshirishga, yoshlar uchun yangi imkoniyatlar yaratishga xizmat qilishi kerak. Yurtimizning olis tumanida roʻyobga chiqarilayotgan loyihalar aynan shu maqsadlarga yoʻnaltirilgani bilan ahamiyatli, — deydi Mehriddin Abdullayev.

Respublika Hisob palatasi raisining birinchi o'rinbosari Mehriddin Abdullayev “Tojikent” MFY da “Issiqxonachilik kooperatsiyasini tashkil qilish” loyihasi bilan ham  tanishdi. “Pahlavon Nazirqul Tursun” fermer xoʻjaligi negizida bulgʻor qalampiri yetishtirishga ixtisoslashgan issiqxona kooperatsiyasi tashkil etiladi. Loyiha umumiy qiymati 2 milliard soʻmni tashkil etib, bu saʼy-harakat  tufayli 3 mingta xonadon kooperatsiya asosida qamrab olinib, ularga barqaror daromad manbai yaratiladi.  

Tahlilardan koʻrinishicha, oʻtgan yil birinchi yarmida Qorakoʻl tumanida xotin-qizlar tashabbuslarini qoʻllab-quvvatlash, biznes loyihalarini amalga oshirish maqsadida umumiy qiymati 4 milliard soʻmdan ziyod imtiyozli kredit sarmoyasi issiqxona, chorvachilik, parrandachilik, tikuvchilik va turli xizmat koʻrsatish sohalarini rivojlantirish maqsadida ajratilgan. 

Masalan, "Tojikent" MFYda "Ayollar daftari"dagi Feruza Akmurodova 60 million soʻm kredit mablagʻi evaziga 5 sotix issiqxona tashkil etgan. Bu tashabbusi orqali F.Akmurodova turmush oʻrtogʻi, oʻzi va qizining bandligini taʼminlab, tomorqasida  4 tonnadan ortiq pomidor yetishtirdi. Shuningdek, Dilnoza Rasulova 27 million soʻm kredit mablagʻi evaziga 7 ta zamonaviy tikuv mashinasi sotib oldi va hozirda oʻzi boshchiligida 8 nafar xotin qiz bozor talablaridan kelib chiqib, tikuvchilik bilan shugʻullanmoqdalar.

Respublika Hisob palatasi raisining birinchi o'rinbosari Mehriddin Abdullayev aynan “Tojikent” MFY da “yettilik” masʼullari bilan ham muloqot qildi. Unda mahallada ishsizlikni kamaytirish, aholi daromadlarini oshirish, ijtimoiy himoya reestrida turuvchi oilalar bilan ishlash hamda ularni qoʻllab-quvvatlash borasida amalga oshirilayotgan ishlar muhokama qilindi.

Bundan tashqari, Hisob palatasi raisining birinchi o'rinbosari “Xoʻjalar” kichik sanoat zonasida faoliyat boshlagan “Parvoz fayz plyus baraka” tikuvchilik korxonasi faoliyati bilan ham tanishdi. Hozirda bu korxonada 400 nafar ishchi oʻrni yaratilgan boʻlib, tikuvchilik yoʻnalishida sifatli va raqobatbardosh mahsulot ishlab chiqarishi yoʻlga qoʻyilgan.

Ayni paytda korxonada zamonaviy tikuv uskunalari oʻrnatilgan boʻlib, ishlab chiqarilayotgan kiyim-kechaklar nafaqat ichki bozor, balki eksport uchun ham moʻljallangan. Loyiha doirasida yoshlar va ayollar bandligi taʼminlanmoqda. 

Umuman, mazkur loyihalar tuman sanoat salohiyatini oshirish, aholi bandligini taʼminlash va iqtisodiy barqarorlikni mustahkamlashda muhim ahamiyat kasb etmoqda.

Viloyat hokimligi matbuot xizmati