Romitan: terimda “Boshiran 4MZ-4C 50” rusumli zamonaviy paxta terish mashinalari qoʻl kelmoqda
2025-09-27 18:40:00 / Yangiliklar
Xususan, 5 ming gektar maydonda gʻoʻzaning Xitoydan keltirilgan "Zoulin Tay-88" va “Xin Lu Zao-57” kabi serhosil navlari, 3 ming gektar yerda mahalliy “Buxoro-10”, “Buxoro-102” hamda 1,3 ming gektar yerda “Buxoro-6” navli urugʻ ekilib, agrotexnik talablarga mos parvarishlandi.
Bilamizki, paxta yetishtirish va uni yigʻib olish — katta kuch va mehnat talab qiladigan jarayon. Qishloq xoʻjaligi murakkab tarmoqlaridan paxtachilikda ham zamonaviy texnologiyalarni qoʻllash orqali mehnat kuchi tejalib, yuqori sifat va samaradorlikka erishish choralari koʻrilmoqda. Shu kecha-kunduzda yigʻim-terimni samarali tashkil etish maqsadida fermer xoʻjaliklariga zamonaviy rusumdagi ikkita “Boshiran 4MZ-4C 50” rusumli paxta terish mashinasi olib kelindi.
Texnik samaradorligiga kelsak, Xitoyda ishlab chiqarilgan “Boshiran 4MZ-4C 50” rusumli kombayn bir kunda 50 tonnagacha paxtani terib olish imkoniga ega. Asosiysi, bu agregat momiq hosilni sifatli va nobudgarchiliklarsiz yigʻib-terib olish imkonini beradi.
Ayni yigʻim-terim mavsumida “Boshiran 4MZ-4C 50” rusumli kombayn Nurafshon hududidagi “Barkamol shijoat zamini” fermer xoʻjaligida sinovdan oʻtkazilmoqda. Mazkur fermer xoʻjaligining 18 gektar yer maydonida paxta yetishtirilgan boʻlib, xoʻjalik jamoasi 70 tonnaga yetkazib “oq oltin” xirmoni bunyod etish harakatida. Terimni mashinada sifatli saranjomlab olish maqsadida defoliatsiya va desikatsiya ishlari bajarilgan.
Umuman, tuman paxtakorlari bu yilgi mavsumda 42 ming tonnadan oshirib “oq oltin” xirmonini barpo etish taraddudidalar. Ayni kunda yuzdan oshiq otryadga birlashgan 7 mingga yaqin hasharchi terimchi bilan birga dalada zamonaviy terim agregatlaridan foydalanilmoqda.
Viloyat hokimligi matbuot xizmati