Buxoro viloyati hokimligi

Viloyat hokimi harbiylarni 26-sentabr – Oʻzbekiston Respublikasi Davlat xavfsizligi xizmati organlari xodimlari kuni bayrami bilan qutlab, Prezidentimiz tomonidan boshlangan islohotlar harbiy sohada oʻz ijobiy natijasini koʻrsatayotgani, harbiy-maʼmuriy sektorlar tashkil etilib, joylarda davlat hokimiyati organlari ham mamlakatimiz mudofaa qudratini mustahkamlashda faol ishtirok etib kelayotgani haqida toʻxtalib oʻtdi.

Mamlakatimiz Prezidenti, Qurolli Kuchlar Oliy Bosh Qoʻmondoni Shavkat Mirziyoyev tomonidan soʻnggi yillarda Qurolli Kuchlarning harbiy-jangovar qudratini oshirish, qoʻshinlar moddiy taʼminotini yaxshilash, zamonaviy va tezkor armiyani tashkil qilish borasida keng koʻlamli ishlar olib borilgani taʼkidlandi.

Xususan, davlat xavfsizlik xizmati chegara qoʻshinlarida ham tub oʻzgarish va yangilanishlar amalga oshirilgani, harbiy qism va shaharchalar infratuzilmasi yaxshilangani, harbiylar uchun zamonaviy xizmat va maishiy sharoitlar yaratilgani,  ularning oila aʼzolarini ijtimoiy himoyalash choralari koʻrilayotgani eʼtirof etildi.

Aytib oʻtilganidek, mazkur yoʻnalishda Buxoro viloyatida ham manzilli tadbirlar amalga oshirildi. Oxirgi besh yilda Buxoro harbiy-maʼmuriy sektorini rivojlantirish jamgʻarmasidan chegara qoʻshinlari boʻlinmalari infratuzilmasini rivojlantirish uchun 70 mlrd. soʻmga yaqin mablagʻ yoʻnaltirildi. Ajratilgan mablagʻlar doirasida Romitan tumanidagi chegara qoʻriqlash vzvodi uchun maʼmuriy va yordamchi binolar majmuasi barpo etildi. Bundan tashqari, harbiy xizmatchilar va ularning oila aʼzolari uchun 13 ta xonadondan iborat turar joy binosi, ularning farzandlari uchun esa maktabgacha taʼlim tashkilotining 20 oʻrinli muddatli guruhi binosi qurib bitkazildi. Hududdadagi stadion, bolalar oʻyingohi va barpo etilgan boshqa obyektlar harbiylarga va ularning oilalariga qulayliklar yaratadi.

Mazkur bino-ishootlarni qurish va foydalanishga topshirish uchun 15,0 mlrd. soʻmga yaqin mablagʻlar ajratildi.

— Amalga oshirilgan ishlar natijasida chegarani qoʻriqlash vzvodi maʼmuriy majmuasi butkul yangi, zamonaviy qiyofaga kirganligini koʻrib turibmiz. Bularning barchasi, Hurmatli Prezidentimiz tomonidan amalga oshirilayotgan tub islohotlarning natijasi desak, aslo mubolagʻa boʻlmaydi. Fursatdan foydalanib, ushbu majmuani qurishda jonbozlik koʻrsatgan quruvchilarimizga alohida minnatdorchilik bildiramiz, - dedi Botir Zaripov. 

Tadbirda faxriy xizmatchilar, nuroniylar ham soʻz olib, yangidan barpo etilgan mazkur harbiy shaharcha harbiylarning oʻz xizmat vazifalarini xotirjam, koʻngillari toʻq boʻlib bajarishlariga, yanada sadoqat va vatanparvarlik hissi bilan jonajon Vatanimiz sarhadlarini qoʻriqlashlarida muhim omil boʻlishini taʼkidlashdi. 

Harbiylarning ijtimoiy himoyasi yoʻlidagi bu kabi katta ishlar uchun Prezidentimizga minnadorlik bildirishdi.

Shundan soʻng inshootlar qurilishida jonbozlik koʻrsatgan qurilish tashkilotlari rahbarlari va xodimlariga alohida ehtirom koʻrsatildi. Yangi xizmat uylari kalitlari oʻz egalariga tantanali tarzda topshirildi. 

Manzildagi shart-sharoitlar bilan tanishilib, uy egalari bilan suhbatlashildi. Nuroniy otaxonlar duoga qoʻl ochib, yurtga tinchlik-osoyishtalik, oilalarga qut-baraka tiladilar.

Viloyat hokimligi matbuot xizmati