Buxorolik ustoz va murabbiylarga davlat mukofotlari topshirildi
2025-09-15 12:10:00 / Yangiliklar
Buxoro viloyati hokimligida davlatimizning yuksak mukofotlarini tantanali topshirish marosimi boʻlib oʻtdi.
Unda viloyatdagi tashabbuskor va fidoyi, faol, taʼlim tizimi rivojiga munosib hissa qoʻshib kelayotgan soha xodimlari ishtirok etdi.
Dastlab viloyat hokimi, Oliy Majlis Senati aʼzosi Botir Zaripov soʻzga chiqib, mamlakatimizda taʼlim tizimida ham keng koʻlamli islohotlar amalga oshirilib, oʻqituvchi va murabbiylar mehnati eʼtirof etilayotganligi va bir qator imkoniyatlar yaratib berilayotganligini alohida tilga oldi.
Taʼkidlanganidek, kyeyingi yillarda butun mamlakatimizda boʻlgani kabi viloyatimizdagi taʼlim muassasalari moddiy-texnik bazasini mustahkamlash borasida ham keng koʻlamdagi ishlar amalga oshirildi.
Xususan, joriy yilning oʻzida viloyat maktabgacha va maktab taʼlimi tizimidagi 271 ta taʼlim muassasalarida qurilish-taʼmirlash va moddiy-texnik bazasini mustahkamlash ishlari olib borilib, ushbu ishlar uchun jami 1 trillion 178 mlrd. soʻm mablagʻ yoʻnaltirilmoqda. Viloyat tarixida hali bir yil hisobida buncha miqdordagi mablagʻ biror marta taʼlimga yoʻnaltirilmagan. Amalga oshirilayotgan islohotlar natijasida Yangi Oʻzbekiston vakillari sifatida viloyatimizdagi koʻpgina oʻquvchi-yoshlari xalqaro fan olimpiadalarida munosib ishtirok etib, medallarni qoʻlga kiritishmoqda. Nufuzli sanʼat festivallari va tanlovlari, xalqaro sport musobaqalarida gʻolib va sovrindor boʻlishmoqda.
Joriy yilda viloyatimiz vakillari tomonidan Xalqaro va respublika fan olimpiadalarida 40 dan ortiq sovrinli oʻrinlar qoʻlga kiritildi. Ushbu oʻquv yilida oʻtkazilgan test sinovlarida ishtirok etgan bitiruvchilarimiz oʻrtacha 96 ball toʻplab, respublikada eng yuqori koʻrsatkichni, yaʼni 1-oʻrinni qayd etdi.
— Albatta, ustozlarimizning mehnatini birgina ushbu jihatlar bilan belgilab boʻlmaydi. Aslida hayotimizdagi har bir omadli qadam, har bir muvaffaqiyat zamirida ustozlarimizning mashaqqatli mehnati, tinimsiz izlanishlari mujassamdir, - dedi viloyat rahbari.
Tadbirda davlat mukofotlari oʻz egalariga tantanali ravishda topshirildi. Mukofotlanganlar nomidan soʻzga chiqqanlar eʼtibor va ragʻbat uchun minnatdorlik bildirib, bunday eʼtirof Yangi Oʻzbekiston taraqqiyoti yoʻlidagi kelgusi faoliyatlarida muhim oʻrin tutishini taʼkidladilar.
Viloyat hokimligi matbuot xizmati