Qorakoʻl: Shakarbek va Chandirobod hududidan oʻtgan “Nimpaykal” arigʻi oʻzani betonlashtirilmoqda
2025-09-13 17:45:00 / Yangiliklar
Respublika Vazirlar Mahkamasining 2023-yil 21-dekabrdagi “2024-yilda suvni tejash hamda suv xoʻjaligi obyektlarini modernizatsiya qilish va rivojlantirish” toʻgʻrisidagi qaroriga muvofiq, Buxoro viloyatida sugʻorish tizimida olib borilgan oʻrganishlardan soʻng 8 ta irrigatsiya tarmogʻini betonlashtirish maqsad qilingan.
Jumladan, Qorakoʻl tumanidagi “Saribozor”, Olot tumanidagi "Tayqir-2" va “Oqpoʻlat” kanallari oʻzanini betonlashtirish, gidropostlarni taʼmirlash ishlari olib borilgani hududdagi oʻnlab fermer xoʻjaligi va tomorqa yer egalarining yuzlab gektar ekin yerlarini “obi hayot”ga qondirish, moʻl hosil yetishtirishda muhim ahamiyatkasb etmoqda.
Chekka tumanda 2024-yilda iirigatsiya tarmoqlarida olib borilgan taʼmirlash-tiklash ishlari samarasi oʻlaroq, umumiy hisobda 245 kilometr uzunlikdagi ichki sugʻorish tarmoqlari oʻzani betonlashtirilgan boʻlsa, joriy yil boshidan Chovli, Sayyot, Oq oltin, Qorahoji, Qoraun, Mallaishayx, Ziyorat, Chandirobod, Jigʻachi, Qozon kabi hududlardan oqib oʻtgan suv yoʻllari oʻzanini betonlashtirish ishlari tizimli olib borilmoqda.
Yaxshi bilamizki, suv – “obi hayot”, tiriklik manbai, kundalik hayotimizni suvsiz tasavvur etib boʻlmas. Sugʻorish tarmoqlarini yangilash, zamonaviy texnologiyalarni joriy etish ishlari bosqichma-bosqich amalga oshirilayotgan shu kunlarda Shakarbek va Chandirobod mahallalarini suv bilan taʼminlovchi “Nimpaykal” arigʻi oʻzanini betonlashtirish ishlari jadal bormoqda.
Mazkur tashabbus tufayli hududda qariyb 1 ming gektar sugʻoriladigan yer maydoni, mahalliy aholining tomorqalari hamda 5 ta fermer xoʻjaligi ekin yerini barqaror suv bilan taʼminlash yaxshilanadi. Natijada, dehqonchilikda hosildorlik ortadi, aholi tomorqasidan olinadigan daromad koʻpayadi.
Hozirda bu loyiha doirasida ariqning 2 ming metr qismi oʻzani betonlashtirilmoqda. Muhimi shundaki, qiymati 1 milliard 300 million soʻmlik loyiha “Tashabbusli byudjet” loyihasi doirasida, aholi va hududdagi fermer xoʻjaliklari tashabbusi va faolligi bilan amalga oshirilmoqda.
Viloyat hokimligi matbuot xizmati