Mustaqillik inshootlari: Qorakoʻlda “Safiya” xususiy maktabgacha taʼlim tashkiloti faoliyat boshladi
2025-09-04 20:15:00 / Yangiliklar
Mahalliy tadbirkor Rustam Moʻminov tashabbusi bilan qurilgan 150 oʻrinli mazkur zamonaviy binoning bunyodkorlik ishlari uchun 2 milliard soʻmga yaqin mablagʻ sarflangan boʻlsa, loyiha amaliyotida tijorat banki tashabbuskorga kredit paketi bilan madadkor boʻldi. Inshootni bolajonlar ixtiyoriga topshirish tadbirida tuman rahbariyati, jamoatchilik vakillari, mahalla faollari, bogʻcha maʼmuriyati hozir boʻldilar.
—Yurtimizda amalga oshirilayotgan yangilanish va bunyodkorliklar zamirida avvalo, yoshlar va kelajak avlod manfaati yotibdi.
Cheqirchida aholi jajji farzandlari uchun ehtiyoj tugʻdirgan bu bogʻcha ham ana shu ezgu maqsadning amaliy ifodasi boʻlib xizmat qiladi,—dedi tuman hokimi Xurshid Tohirov yigʻilganlarni yangi inshoot bilan tabriklab.—Bu yerda bolajonlarimiz uchun barcha shart-sharoit yaratilgan va ularning har tomonlama sogʻlom, bilimli, maktab ostonasiga tayyor boʻlib ulgʻayishi uchun mustahkam asos qoʻyilmoqda.
Darhaqiqat, yangi bogʻchada kichkintoy uchun darsxona va mashgʻulot xonalari, sport va oʻyin maydonchalari, zamonaviy oʻquv qurollari va zarur inventarlar shay qilingan. Muhimi, taʼlim-tarbiyasiga oʻnga yaqin tarbiyachi jalb qilingan muassasaga aholidan talab koʻp, ota-onalar esa bolalar bogʻchasi ertasiga ishonch bilan qarashmoqda.
Tahlillardan koʻrinishicha, ayni kunda Qorakoʻl tumanida 46 ta davlat maktabgacha taʼlim tashkiloti, 12 ta davlat-xususiy sheriklik asosidagi nodavlat maktabgacha taʼlim muassasasi hamda 94 ta oilaviy nodavlat bolalar bogʻchasi faoliyat yuritmoqda. Natijada tumanda bogʻcha yoshidagi bolalarning maktabgacha taʼlimga qamrov darajasi 81,7 foizga yetkazilgan. Bu boradagi saʼy-harakat izchil davom ettirilmoqda.
Viloyat hokimligi matbuot xizmati