Istiqlol inshootlari: “Qulonchi”dagi umumtaʼlim maktabi yangi oʻquv binosi 240 oʻquvchini oʻz bagʻriga oldi
2025-09-04 15:55:00 / Yangiliklar
Marosimda davlatimiz rahbarining tashabbusi bilan mamlakatimiz taʼlim tizimida amalga oshirilayotgan izchil islohotlar jarayonida, umumtaʼlim maktablari uchun yangi zamonaviy binolar qurilishiga katta eʼtibor qaratilayotgani tufayli sohadagi koʻp yillik muammolar hal etilayotgani alohida taʼkidlandi.
Oʻtgan oylarda mahalliy pudratchi “Rusaymer” MCHJ tomonidan bunyod qilingan yangi qoʻshimcha oʻquv binosi 240 oʻquvchi oʻrniga moʻljallangan boʻlib, loyihaga binoan zamonaviy bino qurilishi uchun 2 milliard 800 million soʻm mablagʻ sarflandi.
Ayni kunda chekka hududdagi taʼlim dargohida 341 nafar oʻquvchi tahsil olayotgan boʻlib, shu kunga qadar oʻquv sinflari yetishmasligi sababli oʻgʻil-qizlarimizga moslashtirilgan sharoitda, amallab dars oʻtib kelingani ham bor gap. Nihoyat, yoz oylaridagi saʼy-harakat, 240 oʻrinli qoʻshimcha bino bunyod qilinib, ishga tushirilgani tufayli maktab faoliyati tartibga solindi. Bundan tashqari, talab darajasida jihozlangan maskanda oʻqituvchilar tomonidan oʻquvchilar bilan qoʻshimcha ishlashlari uchun imkoniyat tugʻildi.
Tantanali ochilish marosimi yakunida tadbir ishtirokchilari binoda qishloq oʻquvchilarining risoladagidek taʼlim-tarbiya olishlari uchun yaratilgan shart-sharoit va imkoniyatlar bilan yaqindan tanishdilar. Shu yerda tuman hokimi 1-sinfga qabul qilingan 46 nafar oʻquvchi oʻgʻil-qizga 13 xildagi oʻquv qurollaridan iborat “Prezident sovgʻasi”ni topshirdi.
Viloyat hokimligi matbuot xizmati