Qorakoʻl: “Merganteks” homiyligida 8 nafar bolaning sunnat toʻyi nishonlandi
2025-09-02 21:50:00 / Yangiliklar
Shu bilan birga, davlatimiz rahbari taʼbiri bilan aytganda, “Inson qadri uchun” tamoyili asosida davlat organlari rahbar-xodimlari, saxovatpesha tadbirkorlar tomonidan mahallabay va xonadonbay olib borilayotgan oʻrganishlar natijasida aholining iqtisodiy-ijtimoiy muammolarini hal qilish choralari koʻrilmoqda.
Mamlakatimiz mustaqilligining qutlugʻ 34 yilligi munosabati bilan Qorakoʻl tumanida ham koʻp tarmoqli "Merganteks" paxta-toʻqimachilik klasteri rahbari Ibrohim Hamroyev tashabbusi bilan xayrli ishga qoʻl urildi. Tuman markazidagi “Versal” toʻyxonasida tashkil qilingan tantanada hududdagi mahallalardan kam taʼminlangan, boquvchisini yoʻqotgan, ijtimoiy himoyaga muhtoj oilalarning 8 nafar farzandining sunnat toʻyi oʻtkazildi.
Tuman rahbariyati, jamoatchilik vakillari, mahalla faollari, toʻybolalar va ular ota-onalari, yaqin qarindoshlari hozir boʻlgan marosimda tuman hokimi Xurshid Tohirov barchani yurtimiz istiqlol bayrami bilan samimiy muborakbod etib, sunnat toʻyi nishonlanayotgan avlod vakillari ertasiga katta ishonch bildirdi. Tadbirda koʻpni koʻrgan nuroniylar mamlakatimiz tinchlik-osoyishtaligi, oilalar farovonligi, farzandlar kamolini tilab duoga qoʻl ochdilar.
Shu kuni tashkilotchilar, tuman rahbariyati, homiylar tomonidan bolajonlarga sarupo, velosiped va esdalik sovgʻalari, oʻyinchoqlar topshirildi. Tuman madaniyat uyi xushovoz xonandalari esa diltortar kuy-qoʻshiqlari bilan davraga fayz bagʻishlab, bolalar va ularning yaqinlariga bayramona kayfiyat ulashdilar.
Viloyat hokimligi matbuot xizmati