Qorakoʻl: Eng ulugʻ, eng aziz bayram arafasida 38 nafar bolajonning sunnat toʻyi oʻtkazildi
2025-08-30 19:30:00 / Yangiliklar
Mamlakatimiz mustaqilligining qutlugʻ 34 yilligi keng tantana qilinayotgan shu kunlarda chekka tuman markazidagi “Oʻzbegim” toʻyxonasida kam taʼminlangan va ijtimoiy himoya reestrida roʻyxatda turuvchi oilalarning jajji farzandlaridan yigʻilgan 38 nafar bolaning tantanali sunnat toʻyi tashkil etildi.
Toʻyda tuman rahbariyati, bolajonlarning ota-onalari, qarindosh-urugʻlari, mahalla faollari, mehnat faxriylari va keng jamoatchilik vakillari ishtirok etdilar. Tadbirda soʻz olgan tuman hokimi Xurshid Toxirov:
— Bugun biz farzandlarimizning bir umrlik esda qolarli quvonch-shodiyonasiga sherik boʻlib turibmiz. Ularning koʻnglini koʻtarish, kelajakka ishonchini mustahkamlash—barchamizning burchimiz, albatta. Davlatimiz rahbarining tashabbusi bilan bugun ehtiyojmand oilalarni iqtisodiy “sogʻlomlashtirish”, ularda voyaga yetayotgan navqiron avlod taʼlim-tarbiyasiga jiddiy eʼtibor qaratish, kambagʻallikni qisqartirish va oilalarni doimiy daromad manbaiga ega qilish boʻyicha keng koʻlamli islohotlar amalga oshirilayotgani oʻz samarasini bermoqda. Buning natijasida tumanimizda ham oilalar turmush darajasi oshirilayotgani biz uchun ulkan muvaffaqiyatdir.
— Bugun sunnat toʻyi nishonlanayotgan oʻgʻlonlar orasida mening ham farzandim bor. Bizga koʻrsatilayotgan bu eʼtibor va gʻamxoʻrlikdan boshimiz osmonga yetdi,—deydi oila bekalaridan biri Anora Nishonova.—Oʻgʻlim ham rosa xursand boʻldi. Ayniqsa, farzandlarimizga bosh-oyoq sarupo kiygizilib, velosiped va boshqa esdalik sovgʻalari taqdim qilingani qalbimizni yanada quvonchlarga toʻldirdi. Bu xayrli ish boshida turgan hokimlik, homiy tadbirkorlar, hammaga ming rahmat! Kelgusida albatta, farzandimizni yaxshi oʻqitib, tarbiyalab, yurtimizga foydali inson boʻlib yetishishi uchun harakat qilamiz.
Toʻy tantanasida nuroniylar yurt tinchligi, el farovonligi, Vatan obodligini tilab duoga qoʻl ochdilar. Xushovoz xonandalarning diltortar kuy-qoʻshiqlari esa toʻyga yanada fayz bagʻishlab, bolajonlar va ularning yaqinlariga olam-olam quvonch ulashdi.
Viloyat hokimligi matbuot xizmati