Qorakoʻl: davlat maktabgacha taʼlim tashkiloti soni Qorahojida yana bittaga koʻpaydi
2025-08-30 19:10:00 / Yangiliklar
Mazkur loyihaga muvofiq, qurilish va jihozlash ishlari uchun qariyb 3 milliard soʻm mablagʻ sarflanib, zamonaviy talab darajasida maskan bunyod etildi. Endilikda Qorahoji mahallasi bolajonlari zamonaviy sharoitlarda tarbiya olish, bilim va koʻnikmalarini mustahkamlash imkoniga ega boʻlishmoqda. Inshootni foydalanishga topshirish tantanasida tuman hokimi Xurshid Tohirov boshchiligidagi masʼullar, jamoatchilik vakillari, mahalla faollari va ota-onalar ishtirok etdilar.
— Bugun biz qorahojiliklarning quvonchli kuniga sherik boʻlyapmiz. Yangi bogʻchaning foydalanishga topshirilishi — davlatimiz rahbari tomonidan ilgari surilgan “Inson qadri uchun” degan ulugʻvor tamoyilning amaldagi ifodasidir,—dedi oʻz tabrigida tuman hokimi Xurshid Tohirov.— Binobarin, farzandlarimizning bilimli, sogʻlom va barkamol boʻlib voyaga yetishi uchun barcha qulaylik va imkoniyatni yaratish bizning asosiy vazifamizdir.
Yangi va shinam bogʻchada bolalarning ovqatlanishi, yotib dam olishi, mashgʻulot va toʻgaraklarda shugʻullanishlari uchun barcha shart-sharoit yaratilgan. Sanitariya-gigiyena va tibbiy xizmat xonalari, yosh guruhlar uchun maxsus sinflar, musiqa zali, oshxona, umumiy ovqatlanish zali, yozgi ayvonchalar va oʻyin maydonchalari tashkil etilgan.
Qorahoji mahallasi aholisi uchun yangi bogʻcha ochilishi—koʻpdan kutilgan yangilik boʻldi. Ikki nabirasini bogʻchaga olib kelgan Hasan ota Qurbonov shunday deydi:
— Bu bogʻchani koʻrib koʻnglimiz yorishdi. Qurilgan binosi, ichki sharoitlari, hammasi zamonaviy. Biz ota-bobolar koʻrmagan qulayliklarni farzandlarimiz va nabiralarimiz koʻrib ulgʻaymoqda. Bu davlatimizning xalqimizga boʻlgan mehribonligidan dalolat. Bu yutuq yurtimizda yoshlarga boʻlgan eʼtiborning, bolalar kelajagiga qaratilayotgan gʻamxoʻrlikning yaqqol namunasidir.
Tahlillardan koʻrinishicha, ayni kunda Qorakoʻl tumanida 46 ta davlat maktabgacha taʼlim tashkiloti, 12 ta davlat-xususiy sheriklik asosidagi nodavlat maktabgacha taʼlim muassasasi hamda 94 ta oilaviy nodavlat bolalar bogʻchasi faoliyat yuritmoqda. Natijada tumanda bogʻcha yoshidagi bolalarning maktabgacha taʼlimga qamrov darajasi 81,7 foizga yetkazilgan. Bu boradagi saʼy-harakat izchil davom ettirilmoqda.
Viloyat hokimligi matbuot xizmati