Qorakoʻl: "Yangi Oʻzbekiston" massivida yana yangi xonadonlar oʻz egalariga topshirildi
2025-08-30 14:20:00 / Yangiliklar
Bugun yurtdoshlarimiz bilan gavjumlashib borayotgan massivda baxtli oilalar safi yana 60 taga koʻpaymoqda. Mahalliy pudratchi subyektlar “Bunyod Shahzod fayz” hamda “Ravon taʼmir invest” masʼuliyati cheklangan jamiyatlarining mohir binokor ustalari tomonidan umumiy qiymati 16 milliard soʻm mablagʻ evaziga bu yerda barpo qilingan etilgan 2 ta zamonaviy turar joy majmuasi oʻz egalariga topshirildi.
Uylarni oʻz egalariga tantanali topshirish tadbirida tuman hokimi Xurshid Tohirov boshchiligidagi mutasaddilar, jamoatchilik vakillari, mahalla faollari, zamonaviy, shinam boshpanasiga ega boʻlgan oilalar vakillari hozir boʻldilar.
Eʼtiborlisi, mazkur turar joy inshootlarini qurishda energosamaradorlikni taʼminlash, zamonaviy innovatsion texnologiyalardan foydalanishga alohida eʼtibor qaratildi. Xususan, uzoq yilga imtiyozli kredit sarmoyasi asosida talabgor egalariga rasmiylashtirib topshirilgan yangi koʻp qavatli uylar tom qismiga quyosh panellari oʻrnatilib, tashqi tomoni issiqlik izolyatsiyasi bilan qoplangan.
—Serfarzand oilamiz, bir necha xoʻjalik bir hovlida siqilishib yashab, bugun yillar davomida orzu qilgan xonadonimizga ega boʻldik,—deydi yangi uy egalaridan biri Siroj Yaxshiyev.—Muhimi, bu uylar nafaqat qulay va chiroyli, balki issiq, yorugʻ va iqtisodiy jihatdan ham tejamkor. Oylik hisoblanadigan toʻlovlarini bemalol ishlab toʻlashimizga imkon bor. Bunday qulaylikni bizga yaratib bergan tashkilotchilar, quruvchilarga ming rahmat !
Yangi uy, yangi hayot, yangicha yashash, yangi orzu-niyatlar demak. Zero, har bir oilaning farovon turmushi “Inson qadri uchun” degan gʻoyaning amaldagi ifodasi sifatida bugungi intilishlar, qatʼiy maqsad yoʻlidagi jonbozlik va harakat tufaylidir.
Viloyat hokimligi matbuot xizmati