Buxoro viloyati hokimligi

Temiryoʻlchilar tumanining “Istiqbol” mahalla fuqarolar yigʻinida faoliyat yuritib kelayotgan 16-sonli umumtaʼlim maktabi shu kunga qadar 380 oʻrinli boʻlib, ikki asosiy va qoʻshimcha oʻquv bloklaridan iborat edi. Taʼlim maskanining oʻquv inshooti koʻp yildirki, taʼmirtalab ahvolga kelgan, kapital taʼmirga muhtojligi sababli oʻquvchilar hamda oʻqituvchilar uchun bir qancha noqulayliklar tugʻdirayotgandi. Maktab jamoasi, qolaversa, ota-onalarning murojaatlaridan kelib chiqib, investitsiya dasturi doirasida bu yerda qoʻshimcha ikki qavatli, 240 oʻquvchi oʻrnidan iborat koʻrkam bino bunyod etilgani koʻplarni quvontirdi.  

 Pudratchi korxona “Kogon piramida” MCHJ mohir quruvchilari tomonidan amalga oshirilgan qurilish-bunyodkorlik ishlariga 2 milliard 880 million soʻmga yaqin mablagʻ sarflandi. Eʼtiborlisi, maktabning yangi binosi inklyuziv taʼlim talablariga mos ravishda jihozlanayotganidir. Bunda imkoniyati cheklangan oʻquvchilar uchun nishab yoʻlaklar qurilib, maxsus hojatxona va qulay kirib-chiqish yoʻlaklari ham shay qilingan. 

Bugun, qoʻshimcha oʻquv binosini foydalanishga topshirilishi munosabati bilan tashkil qilingan tadbirda tuman hokimi Otabek Qazoqov, tegishli masʼullar, nuroniylar, maktab jamoasi, faxriylar va ota-onalar hozir boʻldilar. Unda soʻzga chiqqanlar soʻnggi yillarda davlatimiz rahbarining tashabbusi bilan mamlakatimizda maktab taʼlimini rivojlantirish, yosh avlodni munosib sharoitlarda oʻqitish, zamonaviy bilim va koʻnikmalarni egallash imkoniyatlarini yanada yaxshilash borasida amalga oshirilayotgan islohotlarga alohida toʻxtalib, yangi oʻquv binosi bilan maktab jamoasi, oʻquvchilar va ota-onalarni muborakbod etdilar. Marosimda oʻquv binosi qurilishida jonbozlik koʻrsatgan quruvchilarga minnatdorlik bildirildi.  

 Shundan soʻng mehmonlar anʼanaga koʻra alvon lentalarni qirqib, yangi qurib bitkazilgan oʻquv binosida sinf xonalari, oʻquvchilarga yaratilgan shart-sharoit bilan yaqindan tanishdilar. 

Viloyat hokimligi matbuot xizmati