Qorakoʻl: “Hasanobod shifo bol” fermer xoʻjaligi va Iskandarovlar oilasi Jigʻachida asalarichilikni rivojlantirmoqda
2025-08-28 14:50:00 / Yangiliklar
Aholining tomorqadan unumli foydalanishi, bozor va aholi dasturxoni toʻkinligiga munosib hissa qoʻshish xususida gap ketganda, olis tumanda jigʻachilik tomorqachilar birinchilar qatorida tilga olinadilar. Dehqonchilik, asosan tomorqachilik rivojlangan mahallada hozirda 3 ming 200 nafarga yaqin aholi istiqomat qilayotgan boʻlib, tomorqa yeri 76 gektarni tashkil etadi. Shundan qariyb 5 gektarda jigʻachiliklar issiqxona barpo etib, yil boʻyi peshma-pesh sabzavot-poliz mahsulotlari yetishtirish tajribasini oʻzlashtirmoqdalar.
Bu hududda erta bahordan karamning turli navlariga mansub turlaridan ekib yetishtirish ommalashgan. Mahalliy navga mansub bosh karam, shuningdek, salatbop gulkaram va yana brokolli, koreys karamini ekib yetishtirish xoʻjaliklarga yaxshigina daromad keltirmoqda. Jigʻachilik dehqonlar yetishtirgan karamlar anchadan buyon bozor peshtaxtalarida sotilmoqda.
Jumladan, jigʻachilik Iskandarovlar oilasini hamma ”asalchilar oilasi” deb ataydi. Xonadon aʼzolari asalarichilik sohasining boshini tutganiga 40 yildan oshgan, katta tajribaga ega. Ishning koʻzini bilgan asalarichi Gʻayrat Iskandarov oʻtgan yili parvarishlangan 1200 ta asalari oilasidan 25 tonnadan ziyod shifobaxsh asal jamgʻargan. Ayni paytda ham Iskandarovlar oilasi asalarichilik xoʻjaligida 1300 tadan ortiq asalari uyasini parvarishlab, har mavsumda barakali bol yigʻib olishmoqda.
Bugungi kunda Jigʻachi va shu hududdagi yuzdan ortiq xonadon asalarichilikdan muntazam daromad topayotganida, har bir xonadonda oʻrtacha 10 tagacha asalari uyasi parvarishlanayotgani va bu orqali aholi turmushi yaxshilanayotgani zamirida Iskandarovlar oilasi asalarichilari va “Hasanobod shifo bol” fyermer xoʻjaligi hissasi bor, albatta. Aholi tomonidan yigʻib berilgan tabiiy asal xoʻjalik tomonidan sotib olinib, qadoqlanib isteʼmolchilarga yetkazilmoqda.
Xonadoni asal yetishtirish bilan birga, ona asalarilarni koʻpaytirish, soha ishiga qiziqqan qishloqdoshlarga tarqatish bilan ham shugʻullanadi. Har yili erta bahorda 50 dan ortiq xonadonga 300 taga yaqin asalari oilalari yetkazib berish orqali bir oila moddiy manfaatdorligi bilan birga qishloqda asal mahsuldorligi ham oshirilmoqda.
“Hasanobod shifo bol” fermer xoʻjaligi yiliga 70 tonna asalni qayta ishlash imkoniyatiga ega. Bu hajmdagi mahsulot orqali xoʻjalik 5 milliard soʻm atrofida daromadga erishmoqda. Shundan sarf-xarajat zarur uskuna va dastgoh, ish haqi va boshqalarga ajratilishidan tashqari xoʻjalik erishadigan sof foydani chamalash qiyin emas.
Viloyat hokimligi matbuot xizmati