Buxoro viloyati hokimligi

Videokonferensaloqa shaklida oʻtkazilgan yigʻilishda viloyat hokimining tegishli oʻrinbosarlari, huquqni muhofaza qiluvchi idoralar rahbarlari, shahar-tumanlar hokimlari, tashkilot va boshqarmalar mutasaddilari, maktabgacha va maktab taʼlimi boshqarmasi, uning hududiy boʻlimlari masʼullari, maktab direktorlari ishtirok etdi. 

Yigʻilishni viloyat hokimi Botir Zaripov kirish soʻzi bilan ochdi va boshqarib bordi. 

Taʼkidlanganidek, barcha zamonlarda taraqqiyotning asosi ham, mamlakatni qudratli, millatni buyuk qiladigan kuch ham bu – ilm-fan, taʼlim-tarbiya hisoblangan. 

Prezidentimiz Shavkat Mirziyoyevning ushbu fikrlari bugun mamlakatimizda taʼlim tizimini isloh qilishdan koʻzlangan maqsadni bir gapda ifoda etib turibdi. Biz keyingi yetti yil davomida mamlakatimizda taʼlimni, ilm-fanni rivojlantirish uchun bir necha yillar davomida amalga oshirilmagan, bundan yuz yil avval jadid bobolarimiz boshlagan, ammo davom ettirishiga imkon berilmagan ishlarga qoʻl urdik.

Dahaqiqat, davlatimiz rahbari taʼlim sohasini isloh qilishda, ayniqsa, maktab taʼlimini umumxalq harakatiga aylantirib berdi.

Buxoro viloyati misolida oladigan boʻlsak,  bugun hududda faoliyat yuritayotgan 579 ta (546 ta davlat, 33 ta (+6) nodavlat) umumiy oʻrta taʼlim maktabida 336 ming 995 nafar oʻquvchiga 30 ming 645 nafar oʻqituvchi taʼlim-tarbiya berib kelmoqda. 

Birgina joriy yilning oʻzida viloyat maktabgacha va maktab taʼlimi tizimdagi 271 ta taʼlim muassasasida qurilish-taʼmirlash va moddiy-texnik bazasini mustahkamlash ishlari olib borilib, ushbu ishlar uchun jami 1 trillion 178 mlrd. soʻm mablagʻ yoʻnaltirilmoqda. 

— Viloyat tarixida hali bir yil hisobida buncha miqdordagi mablagʻ biror marta taʼlimga yoʻnaltirilmagan. Keng koʻlamli qurilish taʼmirlash ishlari natijasida maktab taʼlimi uchun 24 mingtaga yaqin bolalar va oʻquvchi oʻrinlari yaratilishi rejalashtirilgan. Bu yutuqlarning hammasi Prezidentimiz tomonlaridan sohaga berilayotgan eʼtiborlari natijasidir, - dedi Botir Zaripov.

Taʼlim sifatini oshirish pedagog kadrlarning sifat tarkibi, muallimning kasbiy mahoratiga bogʻliq ekani, soʻnggi yillarda oʻqituvchilarning bilimi va kasbiy mahoratini oshirishga alohida eʼtibor qaratilayotgani, ana shunday chora-tadbirlar tufayli keyingi bir yilda malaka toifasiga ega oʻqituvchilar soni 23 mingdan (76 %) oshgani eʼtirof etildi.
 
Pedagog kadrlarning malaka toifasi yuqoriligi amaliyotda taʼlim sifatiga ijobiy natija koʻrsatayotgani maktablar kesimida tahlil qilindi. 

Qayd etilishicha, birgina oʻqituvchining oylik maoshi malaka toifasini oshirish orqali 38 foizgacha, direktor jamgʻarmasidan har oylik belgilanadigan ustama haqlar orqali 40 foizgacha, fanni yoki chet tillarni bilish darajasi orqali 50 foizgacha oshib boradi. Shu imkoniyatlardan foydalanib, 1000 AQSH dollardan yuqori maosh oladigan oʻqituvchilar soni 250 nafarga yaqin. 

— Biroq ushbu raqamlar viloyatimizning mavjud potensiali uchun juda kamlik qiladi, - dedi viloyat rahbari. 

Yana bir tahlil: 2025-yilda 41 nafar maktab oʻquvchilari respublika va xalqaro fan olimpiadalarida gʻoliblikni qoʻlga kiritdi.

Maktablarda oʻquvchi va xodimlar davomatining haqqoniyligini taʼminlash, inson omilini keskin kamaytirish maqsadida Buxoro shahridagi 15 ta maktabda elektron davomat (Face ID) tizimi joriy etilmoqda. Ushbu tizimni joriy yil yakuniga qadar har bir hududda kamida 20 foiz maktablarda joriy etish zarurligi taʼkidlandi. 

Shuningdek, shahar-tumanlar hokimlari, tegishli masʼullarga taʼlim muassasalarini kelgusi kuz-qish mavsumida barqaror ishlashiga kompleks tayyorlash maqsadida xatlov oʻtkazib, muassasalarning tom qismi hamda issiqlik tizimlarida aniqlangan muammolarni bartaraf etish, 10-11-sinf oʻquvchilarini kasb-hunarga oʻqitish tizimi joriy etilgan viloyatdagi 21 ta maktabning kasb xonalarini oʻquv dasturlari asosida jihozlash hamda oʻquv yili davomida talab asosida xomashyo bilan taʼminlab borish,  qoʻshimcha inklyuziv sinf va guruhlar tashkil etilgan 69 ta maktab va 30 ta maktabgacha taʼlim tashkilotini inklyuziv taʼlim muhitiga tayyorlash,  maktab oʻquvchilari oʻrtasida jinoyatchilikning oldini olish va ota-onalar masʼuliyatini oshirish boʻyicha manzilli profilaktik ishlar olib borish topshirildi.

Bundan tashqari, yangi oʻquv yili, birinchi qoʻngʻiroq tadbirlarini yuqori saviyada tashkil qilish boʻyicha vazifalar belgilandi.

Viloyat hokimligi matbuot xizmati