Buxoro viloyati hokimligi

Qorakoʻl tumani “Tojikent” mahallasida yashovchi Sabohat Safarova ham mazkur imkoniyatdan unumli foydalanib, kollektor boʻyida oʻrdak, gʻoz va kurka boqishni yoʻlga qoʻygani bugun bir oila iqtisodiy ahvolini yaxshilamoqda.  Asosan, parhezbop goʻsht va tuxum yetishtirish maqsadida parvarish qilinayotgan parrandalardan kuniga 150 donagacha tuxum olinmoqda. Mazkur uy xoʻjaligida tashkil qilingan bu tadbirkorlik ortidan birgina tuxumdan tushayotgan daromadning oʻzi kuniga qariyb 200 ming soʻmni, oyiga 5 million soʻmdan ortiqni tashkil etayotgani quvonarli, albatta. 

— Oʻrdaklar 4–5 kilogramgacha, kurkalar esa yaxshi parvarish qilinsa, 12 kilogramgacha goʻsht berishini tajribadan bilib oʻzlashtirdik. Muhimi, boshida qiynalgan boʻlsak, bugunga kelib parrandalar ozuqasi, omuxta yemini taxt qilib, foydaga oʻtdik, parranda mahsulotlarimizga talab, xaridor koʻpaymoqda,—deydi mirishkor xonadon bekasi Sabohat Safarova.—Yaqin atrofdagi umumiy ovqatlanish shaxobchlari, oshxona va kafelardan kelib, oʻzlari olib ketishmoqda. Kollektor boʻylarida parrandachilikni yoʻlga qoʻyish uchun katta mablagʻ talab qilinmadi, ammo oʻrdak, gʻoz, kurka parvarishining veterinariyasidan boxabar boʻlish, emlashlarini vaqtida berish, kasallik yuqtirmaslik ham juda zarur. Suv boʻyida jonvorlar tabiiy ozuqa bilan ham oziqlanamoqda, bu esa sarf-xarajatni kamaytirib, daromadimizni oshirmoqda.  

Eʼtiborlisi, shu bir oila tashabbusi bilan bugun Tojikentda Safarova uy xoʻjaligi tajribasini oʻzida sinab koʻrayotganlar safi kengaymoqda. Bundan koʻrinadiki, chekka qishloqda odamlar ishsizligiga barham berilib, oʻziga xos tarmoq, daromad manbai yaratildi. Parrandachilik orqali bozor va shu atrofdagi savdo rastalarini arzon mahsulot bilan taʼminlanayotgani quvonarli. 

Xullas, kollektor boʻyida baliq va parrandachilik rivojlantirilayotgani  kam xarajat, ammo moʻl daromad manbai boʻlib, oilalarning turmush darajasini yaxshilash, qishloq aholisi bandligini taʼminlashda muhim oʻrin tutmoqda.

Viloyat hokimligi matbuot xizmati