Romitan: istiqbolli loyihalar qatorida “Sohil boʻyi” koʻngilochar dam olish maskanida ish qizgʻin
2025-08-23 14:20:00 / Yangiliklar
Birinchi bosqichda 2 ta xizmat koʻrsatish loyihasini ishga tushirilishi natijasida 95 ta ish oʻrni yaratilishi koʻzda tutilgan. Jumladan, “Afrosiyob” mahalla fuqarolar yigʻinidagi Shifokor koʻchasining 800 metr qismini tunu-kun faoliyat yuritadigan, “24/7 rejimi”da faoliyat yuritish orqali 15 ta tashabbuskor biznes vakili faoliti yoʻlga qoʻyiladi. Xuddi shunday, 10 ta tadbikorlik subyektining faoliyati kengaytirilishi natijasida jami 30 nafar fuqaro doimiy bandligi taʼminlanishi rejalashtirilgan. Bugunga kelib hududda 20 ta tashabbuskor tadbirkor tomonidan qurilish, jihozlash ishlari amalga oshirilmoqda.
Shunday loyihalardan biri “Xayrobod” kanalining tuman markazidan oʻtgan 1,2 kilometr qismida sohil boʻyi dam olish va koʻngilochar xizmatlar koʻrsatish markazidir. Oʻzbekiston Respublikasi Prezidentining 2022-yil 27-yanvardagi “Xizmatlar sohasini rivojlantirishga oid qoʻshimcha chora-tadbirlar toʻgʻrisida”gi PQ-104-sonli qarori bu borada dasturilamal vazifasini oʻtamoqda.
Ayni kunda bu manzilda aholiga xizmat koʻrsatish loyihalarini amalga oshirish uchun 31 nafar tashabbuskor tadbirkor tomonidan savdo va dam olish maskanlari tashkil etilayotgani natijasida jami 60 nafar fuqaro uchun ish oʻrni yaratilishi belgilangan. Shu kunlarda esa 21 ta tadbirkorlik loyihasi doirasida qurilish-rekonstruksiya ishlari amalga oshirilmoqda.
Bugunga kelib tuman markazidan oʻtuvchi suv yoʻlining himoya mintaqasida barpo qilishga kirishilgan savdo, umumiy ovqatlanish va koʻngilochar maskanlar xususiy tadbirkorlar tomonidan qurib, foydalanishga topshirilmoqda.
Xususan, keng turdagi sifatli va rang-barang taomlari bilan aholiga xizmat koʻrsatishni maqsad qilgan “Zahratun”—fast food umumiy ovqatlanish tarmogʻi yengil konstruksiyali qurilish materiallaridan foydalangan holda “Sohil boʻyi” koʻngilochar maskanida oʻz ish faoliyatini yoʻlga qoʻydi. Romitanlik tashabbuskor tadbirkor Akobir Hamroyev tashabbusi bilan qad rostlagan bu yemakxona hozirda 8 ta ish oʻrni yaratib, oʻnga yaqin yoshning kundalik bandligini taʼminlamoqda.
Viloyat hokimligi matbuot xizmati