Buxoro viloyati hokimligi

Ushbu topshiriq asosida hukumat qarori bilan “Ilk rivojlanish markazlari toʻgʻrisida”gi nizom tasdiqlangan boʻlib, Nizom maktabgacha taʼlim bilan qamrab olinmagan hamda alohida taʼlim ehtiyojlari boʻlgan bolalarga taʼlim-tarbiya xizmatlarini koʻrsatish boʻyicha Ilk rivojlanish markazlarini tashkil etish tartibini belgilaydi.

Markazlar 3–6 yoshli bolalarni, xususan, kambagʻallik darajasi yuqori va alohida taʼlim ehtiyojlari boʻlgan oilalar farzandlarini qamrab olgan holda tashkil etilishi koʻzda tutilgan. 

Maktabgacha taʼlim tizimini yanada takomillashtirish, bolalarning sifatli maktabgacha taʼlimdan teng foydalanishini taʼminlash, alohida taʼlimga ehtiyoji boʻlgan bolalarni maktabgacha taʼlim bilan qamrab olish maqsadida Buxoroda ham “Ilk rivojlanish markazlari” faoliyati bosqichma-bosqich yoʻlga qoʻyilmoqda.

Bugun Gʻijduvon, Vobkent va Jondor tumanlarida farzandlarimiz kelajagi uchun xizmat qiladigan, ularning iqtidori va orzularini roʻyobga chiqaradigan ana shunday “Ilk rivojlanish markazlari” oʻz faoliyatini boshladi.

Aytish joizki, Gʻijduvon tumanidagi 66-umumtaʼlim maktabi binosining boʻsh turgan bir qismi ssuda orqali berilgan 400 million soʻm mablagʻ hisobiga tamirlanib, bolalarning taʼlim-tarbiya olishlari uchun zarur shart-sharoitlar yaratildi. 

Markazda ijtimoiy himoyaga muhtoj, kam taʼminlangan oila farzandlari va inklyuziv taʼlimga ehtiyoji bor bolalar tarbiyalanadi. Markazga ikki navbatda 240 nafar oʻgʻil-qizni qamrab olish imkoni bor. Bu yerda pedagoglar tomonidan aqliy rivojlantirish mashqlari, turli mashgʻulotlar oʻtkaziladi. 

— Bizning oldimizga kam taʼminlangan, ijtimoiy koʻmakka muhtoj va ehtiyojmand oilalarning maktabgacha taʼlimga qamrab olinmagan farzandlari, shuningdek, alohida taʼlimga ehtiyoji bor bolalar bilan individual ishlash, ularning shaxsiyatini shakllantirish va ijodiy qobiliyatlarini rivojlantirish, zamonaviy inklyuziv maktabgacha taʼlim va tarbiya olishlari imkonini beruvchi qulay muhit yaratish, ijtimoiy moslashuvi va boshlangʻich taʼlimga tayyorligini taʼminlash, bu jarayonida bolaga va ota-onalarga har tomonlama yordam berish kabi vazifalar qoʻyilgan. Uyga tashrif buyurish dasturi orqali ham ijtimoiy himoyaga muhtoj, kambagʻal, kam  kam taʼminlangan oilalarning bogʻchaga qamrab olinmagan 3-7 yoshgacha boʻlgan bolalariga taʼlim-tarbiya berish moʻljallangan. Lekin bolalar orasida bir yoshlilari ham bor. Bunda pedagog xodimimiz haftada kamida bir marta xonadonga borib, belgilangan dastur asosida bola bilan mashgʻulot oʻtadi, - deydi viloyat maktabgacha va maktab taʼlimi boshqarmasi boshligʻi Hamza Elliyev. 

Gʻijduvon tumanida faoliyat boshlagan “Ilk rivojlanish markazi”ning ochilish marosimida viloyat hokimi Botir Zaripov soʻzga chiqib, yigʻilganlarni mamlakatimiz mustaqilliging 34 yilligi hamda yangi muassasa bilan qutladi. 

Yigʻilganlar markazda yaratilgan shart-sharoitlar bilan yaqindan tanishishdi. 

Shuningdek, Vobkent va Jondor tumamnlarida ham xuddi shunday markazlar faoliyat boshladi. 

Viloyat hokimligi matbuot xizmati