Romitan: “Temur”, “Zamin”, "Yarash Rasul" fermer xoʻjaliklari takroriy ekinlarda ham faol
2025-08-20 20:00:00 / Yangiliklar
Ayni shu kunlarda Romitan tumanida gʻalladan boʻshagan maydonning 6040 gektarida, jumladan, 352 gektarda sabzavot, 553 gektarda kungaboqar, soya va boshqa moyli ekinlar, 274 gektarida loviya, mosh kabi dukkakli ekinlar, 220 gektarida poliz mahsulotlari, yana 2219 gektar yer maydonida chorva tarmogʻi uchun ozuqabop ekinlar yetishtirish harakati allaqachon boshlangan.
Bu agrotexnik tadbirda takroriy ekinni talab darajasida ekish, “Bir kontur—bir mahsulot” tamoyili asosida qishloq xoʻjaligi mahsulotlarini yetishtirishda agronom-mutaxassislar tomonidan xoʻjaliklarga zarur tavsiya va topshiriqlar berilmoqda.
Maʼlumki, gʻalladan boʻshagan yerlarda takroriy ekinlarni joylashtirish orqali bozorni arzon va sifatli mahsulotlar bilan taʼminlash, eksport salohiyatini oshirish imkoniyatini beradi. Shu maqsadda, baoakali hosil uchun gʻalladan boʻshagan jami 6040 gektar maydon takroriy ekinlar bilan toʻliq oʻzlashtirilmoqda. Bu jarayonda tumandagi fermer xoʻjaliklari va dehqonlar tomonidan agrotexnik qoidalarga qatʼiy amal qilinmoqda.
Shu kunlarda hududdagi “Temur”, “Zamin”, "Yarash Rasul" kabi fermer xoʻjaliklarining har birida yarim gektardan oshiq yer maydonida kechki kartoshka ekib parvarishga kirishilgan. Mazkur ekin eksportbop, yuqori hosildorlikka ega navlar asosida tanlab olinib, har bir fermer xoʻjaligi tomonidan agrotexnik tadbirlar belgilangan muddatda va sifatli amalga oshirilmoqda.
Avvalo, jamoasi moddiy manfaatdorligi xususida qaygʻurayotgan dehqon, fermerlar bugungi murakkab iqlim va iqtisodiy sharoitda aholi dasturxoni toʻkinligi yoʻlida oʻzlarining fidokorona mehnatlari bilan baholiqudrat hissa qoʻshmoqdalar.
Viloyat hokimligi matbuot xizmati