Buxoro viloyati hokimligi

Shu maqsadda Kogon tumanida ham manzilli chora-tadbirlar olib borilmoqda. Yaqinda respublika togʻ-kon sanoati va geologiya vazirligi, tuman hokimligi va prokuraturasi hamkorlikda “Niyoz hoji” mahalla fuqarolar yigʻinida kam daromadli, kambagʻallik reestrida boʻlgan oilalarning 11 nafariga  "Kambagʻallikdan farovonlik sari" dasturi asosida zarur mehnat dastgohlari, asbob-uskunalar olib berilgani ayni muddao boʻldi. 

Ehtiyojmand bu oilalarning mehnatga layoqatli aʼzolariga oʻz qiziqish va   ehtiyojlaridan kelib chiqib, jumladan, 4 nafariga motokultuvator, qoʻlida hunari boʻlaturib uyda ishsiz qolgan 5 nafar chevarga zamonaviy rusumli “JACK” tikuv mashinasi,  pishiriq pishirish uchun pech kabi zarur uskunalar tarqatildi. Muhimi, endi bu imkoniyatga ega boʻlgan fuqarolar oʻzlari yakka tartibda daromadli ish bilan shugʻullanib, mehnatlari evaziga moddiy manfaat topib, avvalo roʻzgʻorlari kam-koʻstini oʻnglaydilar. 

Bugun kogonliklarning oʻnlab tomorqachi xonadonlarida mirishkor dehqonlar mehnati bilan ekin yeridan unumli foydalanib, dasturxon toʻkinligini taʼminlash, sarxil, sifatli va arzon qishloq xoʻjaligi mahsulotlari yetishtirishda ham katta tajriba toʻplangan. Bu boradagi ishlarni birgina “Bahouddin Naqshband” MFY misolida ham koʻrish mumkin. Mazkur mahallalada hozirda 1 mingtadan oshiq xonadonda jami 5 mingdan ortiq aholi vakili istiqomat qilmoqda. Mahallaning asosiy tirikchilik manbai, yaʼni  “drayveri”—issiqxonachilik va maishiy xizmat koʻrsatish tarmoqlarini tashkil etadi. 

Mahallaning mehnatsevar va tomorqa bilan “tillashadigan” oilalaridan biri Teshayevlar xonadonidir. Xususan, bunda mirishkorlar koʻp yildirki, oʻz tomorqa yeridagi 25 sotixdan iborat issiqxonasidan samarali foydalangan holda har yili pomidor, bodring, kartoshka, baqlajon, bulgʻor qalampiri kabi ekinlardan yaxshi daromadga ham erishib kelishadi. 

—Dehqon farzandi emasmizmi, bizga berilgan imkoniyat, tomorqani xor qilsak, “kosamiz oqarmasligi” tayin. Shu bois, oilamizda kim qaysi kasb-korda ishlamasin, albatta, ekin yerida mehnat qilib, hosil yetishtirishga ishtiyoqimiz baland,—deydi xonadon sohibi Nuriddin Teshayev.—Erta tongdan ishni aynan tomorqadan boshlab oʻrganganmiz. Peshona terini toʻkib, yerga mehr berib, kam boʻlmadik. Oʻz oʻrnida, davlatimiz yaratgan imkoniyatlardan foydalanib, bugun uning natijasini hosil daromadida koʻrayapmiz. 

Issiqxonadan bir mavsumda 10 tonnaga yetkazib pomidor hosilini yigʻishtirib olgan Teshayevlar oilasi albatta, mehnatiga yarasha yaxshigina manfaatdor boʻldi. Shu bilan birga, almashlab ekishda baqlajondan moʻl hosil yetishtirib, ichki bozorga sara hosil chiqardi. Shu bilan birga, yil boshidan kartoshka, kech kuzda turli koʻkatlar, sarimsoqpiyoz ekib yetishtirilayotgan xoʻjalik faoliyati tahsinga loyiq. Zero, oilalarni boy va dasturxonini toʻkin qilishning birdan-bir yoʻli halol mehnat, harakat va izlanishdir. 
     
Viloyat hokimligi matbuot xizmati