Buxoro viloyati hokimligi

Bu borada Kogon tumani “Yangi hayot” MFY da masʼuliyati cheklangan jamiyati shaklidagi “Parravshan trans” tovuqchilik fermasi 2010-yildan oʻz faoliyatini boshlab, hozirda chorvachilik va parrandachilik tarmoqlarini rivojlantirmoqda. Keyinchalik zamonaviy texnologiya bilan jihozlab, faoliyatni kengaytirish hamda ishlab chiqarish quvvatini oshirish maqsadida kredit mablagʻlari olingan.

Hozirda korxonada 5 ta sex faoliyati yoʻlga qoʻyilgan boʻlib, 150 ming boshdan ortiq "Loman sendiy" zotiga mansub xorij zotli tovuq boqilmoqda.

Dastlab kichik hajmda faoliyatini boshlagan korxona parranda va chorva mollari sonini koʻpaytirish maqsadida “Xalq banki”dan 12 milliard 300 million soʻm miqdorida moliyaviy koʻmak olgan. Bu koʻmak korxonaning faoliyat koʻlamini kengaytirib, chorvachilik va oziq-ovqat sanoati rivojlanishiga hissa qoʻshib kelmoqda.  

Korxonada 140 nafar xodim ish bilan taʼminlangan boʻlib, yillik daromad 5 milliard 600 million soʻmni tashkil etadi. Ishlab chiqarish jarayoni zamonaviy texnologiyalar asosida tashkil qilinganligi sabab, mahsulotlarning sifati talabga javob beradi.  

Aynan parrandachilik aholini oziq-ovqat mahsulotlari bilan taʼminlashda ulkan ahamiyat kasb etib, qishloqlarda odamlarning ish bilan band boʻlishiga katta hissa qoʻshadi. Shu jihatdan olganda, mamlakatimizda parrandachilikni rivojlantirishga alohida eʼtibor qaratilib, buning uchun imkoniyat va imtiyozlar yaratilayotgani diqqatga sazovor.

 Zooveterinariya talablari asosida parvarish olib borilayotgani tufayli korxonada kuniga 130 mingdan ortiq tuxum tayyorlanib, mahalliy bozorga yetkazib bermoqda. Shuningdek, ishlab chiqarishni yanada kengaytirish hamda yangi ish oʻrinlari yaratish maqsadida 100 ming bosh parranda boqishga moʻljallangan yangi sex pavilyoni qurilish ishlari olib borilmoqda.

Viloyat hokimligi matbuot xizmati