Buxoro viloyati hokimligi

Maʼlumotlarga koʻra, bu daraxtning tur va navlari koʻp. Ammo bizning mamlakatimiz iqlim sharoitiga asosan “Katalpa”, “Elongata”, “Farges” kabi turlari tez moslashadi. Pavlovniya daraxti juda tez oʻsuvchi oʻsimlik boʻlgani bois, yerga ekilgan nihol bir yilda 5 metrgacha boʻy choʻzadi. Ilk yildayoq mingta daraxtdan ming tonnagacha biomassa olish mumkin.

Pavlovniya gullaganda asalarilar oilasi uchun yaxshigina asal manbai boʻladi. Gulidan kosmetika sanoatida keng foydalanilib, iforidan atir olinadi. Gullash mavsumida 1 ta asalari oilasi 10-15 kilogramm asal yigʻadi. Pavlovniya plantatsiyasiga asalari oilalari qoʻyilsa, 1 gektardan 5-6 yilda ming kilogrammgacha yuqori sifatli asal olish mumkin.

Tabiatni sevuvchi, yoshligidan koʻchat yetishtirishga ishtiyoqmand, “Oqoltin” mahallasida yashovchi Darmon Qurbonovning mehri va mehnati bilan yaratilgan 25 sotix maydonda pavlovniya daraxti nihollari yashnab turibdi.

Shu yilgi bahor mavsumida ekilgan daraxtlar boʻyi allaqachon 1,5-2 metrga yaqinlashib qolgan. Bundan tashqari, daraxtzor yaqiniga 10 dan ortiq asal ari uyasini ham keltirib, sifatli asal olishni yoʻlga qoʻygan. 

— Pavlovniya daraxtini maqsadga qarab ekilish usullari koʻp. Biz yogʻoch olib, tayyor mahsulot qilib sotishni reja qilganimiz uchun pavlovniya nihollarini oralarini ochib ekkanmiz, — deydi Darmon Qurbonov. — Bu oʻsimlik haqiqatan koʻplab noyob xususiyatlarga ega boʻlib, uning yogʻochi engil va zichligi boʻyicha dunyoda birinchi oʻrinda turarkan.  Pavlovniya oʻstirish katta mashaqqat talab qilmaydi. Har qanday noqulay ob-havo sharoitiga chidamli bu koʻchatni yetishtirish uchun asosan sugʻorishga eʼtibor qaratish lozim.

Yaʼni, daraxtning yaxshi oʻsishi uchun suvli joy boʻlishi, tuproq doim nam boʻlib turishi kerak. Suv boʻlmasa, pavlovniya qurib qolmaydi, lekin yaxshi rivojlanmaydi. Bu daraxt tez oʻsuvchan boʻlgani sababli bir yilda 5 metrgacha boʻy choʻzishi mumkin.

Viloyat hokimligi matbuot xizmati