Buxoro viloyati hokimligi

Shubhasiz, soʻnggi yillarda kambagʻal, ijtimoiy moddiy koʻmakka muhtoj oilalarga qulay imkoniyatlar yaratish, imkon qadar kambagʻallikni qisqartirishga doir muhim chora-tadbirlar oʻz samarasini bermay qolmadi.  Ayniqsa, “Temir daftar”, “Ayollar daftari”, “Yoshlar daftari” kabi tizimlarning joriy etilishi ehtiyojmand qatlamlarni aniq aniqlash, ularning muammolarini manzilli hal etish imkonini berdi. Bugun har bir mahalla faoli, xotin-qizlar faoli yoki yoshlar yetakchisi oʻz hududidagi kambagʻal oilalar holatidan yaxshi xabardor.

Davlatimiz rahbari tomonidan 2025-yil 8-may sanasida “Kambagʻal oilalarni davlat tomonidan ijtimoiy qoʻllab-quvvatlash tizimini yanada takomillashtirish toʻgʻrisida”gi Prezident Farmonining qabul qilinganligi ijtimoiy taʼminotga muhtoj, kam taʼminlangan oilalarni qoʻllab-quvvatlash va ularga imkon qadar moddiy tomonlama qulay shart-sharoitlar yaratish borasidagi muhim sa'y-harakatlardan biri deyishimiz mumkin. Farmonga koʻra, joriy yilning 15-may sanasidan Kambagʻal oilalar reestriga kiritilgan va ushbu reestrga tushish xavfi mavjud boʻlgan oilalar oʻz navbatida “qizil”, “sariq” hamda “yashil” toifalarga boʻlinib, qaysi toifaga mansubligiga qarab qoʻllab-quvvatlash choralari koʻrilmoqda.

Farmonining 2-ilovasi 6-bandiga asosan kambagʻal oilalar reestriga kiritilgan oilalarga rahbar va oʻrinbosarlarni biriktirish belgilangan. Shunga koʻra, viloyat hokimining qishloq va suv xoʻjaligi masalalari boʻyicha oʻrinbosari Amrillo Nazarov Romitan tumanining “Poyjoʻy” mahalla fuqarolar yigʻinida yashovchi 5 ta oilaga biriktirilgan.

Kuni kecha Amrillo Nazarov oʻziga biriktirilgan kambagʻal oilalar aʼzolari bilan koʻrishib, ular bilan yuzma-yuz muloqotda tashvish-muammolarini tingladi. Shu kuni oilalarning yashash sharoiti yaqindan koʻzdan kechirilib, turmushini yaxshilash uchun avvalo chuqurlashtirilgan tibbiy koʻrikka jalb qilinayotgan bu fuqarolarning har biriga layoqati va xohishiga mos ish bilan taʼminlash harakatiga kirishildi. 

Elmira Botirovaning 2 nafar voyaga yetmagan farzandi bor. Turmush oʻrtogʻi Bobomurod Hamroyev oldingi turmushidagi bolalariga aliment toʻlaydi. Oila tebratishiga mablagʻi yetmaydi. Oila mahalladagi ogʻir sharoitda yashaydigan oilalar roʻyxatida turadi. Muloqot chogʻida Elmira bolasini bolalar bogʻchasiga imtiyozli joylashtirishni soʻradi.

Yuqori Poyjoʻy qishlogʻida yashovchi Nigora Atoyeva esa ruhiy kasal, 2-gurux nogironi, nafaqada hamda moddiy yordam oladi. Fuqaroning muammosi oʻrganilganda, Nigoraga qarab turuvchi qilib, kelini M.Umurovani biriktirish soʻraldi.
 
Quyi Poyjoʻy qishlogʻida yashovchi Mastura Ochilova esa boquvchisini yoʻqotgan, kambagʻal oilalar roʻyxatiga olingan. Boz ustiga koʻzi ojiz, yurolmaydi. Oʻgʻli Javohir Ravshanov, kelini va ikki nafar nevarasi bilan yashaydi. Muloqot chogʻida uning dori-darmon uchun mablagʻga ehtiyoji borligi aniqlandi.  

Quyi Poyjoʻy qishlogʻida yashovchi Iroda Xoliqovaning oilasida besh nafar kishi yashaydi. Turmush oʻrtogʻi Ato Gʻafforov jigar serrozi kasalliliga chalingan, 2-guruh nogironi. Muloqotda er-xotinni ishga joylashtirish soʻraldi.  Oʻrganishlar doirasida aniqlangan muammolarni hal qilish boʻyicha chora-tadbirlar belgilanib, ijrosi nazoratga olindi. 

Xulosa oʻrnida shuni aytish mumkinki, bugun davlat siyosatining markazida faqatgina yordam berish emas, balki imkoniyat yaratish tamoyili turibdi. Yaʼni kambagʻal oilalarga vaqtincha yordam berish emas, balki ularni mustaqil turmush tarziga, barqaror daromad manbaiga ega boʻlishga undash — davlat siyosatining ustuvor yoʻnalishiga aylangan.

Viloyat hokimligi matbuot xizmati