Buxoro viloyati hokimligi

Xususan, joriy yil 14-fevral kuni yoshlar bilan ochiq muloqot tarzida oʻtkazilgan videoselektor yigʻilishida davlatimiz rahbari tomonidan mahallalarda yoshlar bilan ishlash masalalarini muvofiqlashtirish boʻyicha respublika komissiyasi qarori bilan “Yoshlar balansi” asosida alohida ishlash talab etiladigan yoshlarni vazirlik va idoralar, mahalliy ijro etuvchi hokimiyat organlari rahbarlariga biriktirish vazifasi yuklatilgan edi.

Mazkur topshiriqqa asosan Buxoro viloyati hokimligi huzuridagi “Yagona buyurtmachi xizmati” injiniring kompaniyasi  rahbari Azizjon Toʻxtamishovga Kogon tumanining “Tutkunda” mahalla fuqarolar yigʻinida yashovchi 13 nafar ishsiz yoshlar biriktirilgan. 

Olib borilgan oʻrganishlar davomida bugungi kunda ularning 7 nafari migratsiyada ekanligi va tayinli daromadi mavjudligi aniqlangan. Qolgan 6 nafari bilan yuzma-yuz gaplashilganda ular qiziqishlariga qarab, oʻzini oʻzi band  qilishi uchun tikuv mashinasi hamda payvandlash uskunasi kerakligini bildirishgan.

Shunga asosan bugun Azizjon Toʻxtamishov mahallada boʻlib, oʻziga biriktirilgan yoshlar bilan yana bir bor uchrashdi. Muloqotda ishsiz yoshlarni tadbirkorlikka jalb qilish, bandligini taʼminlash hamda muammolarini bartaraf etish masalasida fikr almashildi.
Yoshlarning har biri bilan alohida suhbat qilinib, muammo va takliflari eshitildi. Ularga tikuv mashinalari va payvandlash uskunasi topshirildi.

Viloyat hokimligi matbuot xizmati