Kogon shahri: Dilfuza Ergasheva chorvachilikdan, Feruza Egamberdiyeva tikuvchilikdan oilasiga daromad kirityapti
2025-07-22 18:45:00 / Yangiliklar
Yaqin-yaqingacha mavsumiy ishlar bilan shug‘ullanib kelgan Dilfuza opa yurtimizda ayollar tadbirkorligiga, ularni qo‘llab-quvvatlashga qaratilgan islohotlar natijasida bugun o‘zi ham tadbirkor bo‘lib, oilasi daromadiga daromad qo‘shmoqda.
Dilfuza opaga faoliyatini boshlash uchun mahalladagi hokim yordamchisining tavsiyasi bilan “Biznesni rivojlantirish banki”| Kogon shahar filiali tomonidan 3 yillik muddatga 33 mln. so‘m imtiyozli bank krediti ajratildi.
– Yoshligimdan chorvachilikka qo‘ygan mehrim tufayli kam bo‘lmadim, – deydi Dilfuza Ergasheva. – Shu kunlarda parvarishlayotgan nasilli qo'ylar soni 20 boshga yetgan. Bundan yil davomida qo‘lga kiritadigan daromadimizni chamalasak, 60-70 million so‘mdan kam emas. Hozirda chorva mollari ozuqasi uchun ekin yerini kengaytirib, faoliyatimizni jonlantiryapmiz.
Shahar hokimining mahalladagi yordamchisi koʻmagida Feruza Egamberdiyevaning faoliyatini kengaytirish maqsadida 33 million soʻm miqdoridagi imtiyozli kredit mablagʻi ham ajratilgani ayni kutilgan ish boʻldi. Amaliy yordam samarasi oʻlaroq, chevar Feruza Egamberdiyevaning oʻziga boʻlgan ishonchi oshib, yakka tartibdagi ishini kichik korxona koʻrinishidagi sexga aylantirish fikri tugʻildi.
Endilikda shu birgina xayrli ish ortidan yana 3 nafar mahalladosh xotin-qizning bandligi taʼminlanmoqda. Ular ham Feruza chevardan hunar sirlarini oʻrganib, kundalik tushayotgan buyurtmalarni bejirim tikib tayyorlab berishga diqqat-eʼtiborlarini qaratdilar.
Ustoz-shogird anʼanasi asosida bir–biri bilan dugonaga aylangan chevarlarning mashaqqatli mehnati ortidan kelayotgan daromad ham moʻmaygina boʻlib, bir oylik sof foyda 6-7 million soʻmni tashkil etayotgani ularga ishga boʻlgan qiziqish va kuch-quvvat bagʻishlamoqda. Buyurtmaga asosan daromadga ega boʻlishib, oilalariga qoʻshimcha sarmoya kiritishmoqda. Bir soʻz bilan aytganda, bu kabi saʼy-harakat avvalo, xotin-qizlar oʻrtasida ijtimoiy faollikni oshirish, ularning hayot darajasi, turmush sifatini yaxshilashga xizmat qiladi.
Mahalla maʼmuriyati yaqin koʻmagida Feruza risoladagidek tikuvchilik mashinasi bilan taʼminlangani juda qoʻl keldi. Zamonaviy rusumli tikuv dastgohi chevar isteʼdodini yuzaga chiqarishda muhim vosita boʻlmoqda.
Viloyat hokimligi matbuot xizmati