Buxoroda 28-bor oʻtkazilgan “Qovun sayli” yakunlandi: gʻolib dehqon va fermerlar munosib taqdirlandi
2025-07-19 21:40:00 / Yangiliklar
1996-yildan buyon katta uyushqoqlik bilan tashkil etib kelinayotgan “Qovun sayli”da “Koʻkcha”, “Amiri”, “Novvoti”, “Boʻrikalla”, “Kampirchopon”, “Dahbedi”, “Sherozi”, “Toshloqi”, “Gulobi”, “Barginay” kabi oʻttizga yaqin bir-biridan xushxoʻr nav taqdim etildi.
Bu yilgi sayilda viloyatning barcha tumanidan kelgan 600ga yaqin fermer xoʻjaligi tomonidan tanti dehqonlarimiz mehnati mahsuli —qariyib 10 ming tonna qovun-tarvuz shaharliklar dasturxoniga tortiq qilindi. Bundan tashqari, turli meva-sabzavotlar, asalchilik mahsulotlari koʻrgazmasi ham tashkil etildi.
Buxoro shahrining diqqatga sazovor markazi Ark qoʻrgʻonida boʻlib oʻtgan ikki kunlik “Qovun sayli” nafaqat shaharliklar va mehmonlarni, balki chet eldan kelgan sayyohlarni ham befarq qoldirmadi.
Bu yilgi “Qovun sayli” ham chinakam bayram tusini oldi. Unda qatnashgan har bir tuman uchun alohida maydon, joy hozirlanib, oʻsha hudud folklor-etnografik ansambllari diltortar kuy-qoʻshiqlari, konsert repertuari bilan yigʻilganlar koʻnglini xushladi.
Sayil yakunida alohida oʻrnak koʻrsatgan dehqon-mirishkorlar ragʻbatlantirildi. “Eng yaxshi qovun turlarini ekkan fermer” nominatsiyasida Peshku tumani “Qoraqalpoq” hududidagi “Abdurahmonobod” fermer xoʻjaligi rahbari Abduxalil Rahimov, “Eng yaxshi qovun yetishtirgan dehqon” nominatsiyasida Peshku tumani “Mustaqillik” hududidagi “Sultonali Rahmat intensiv bogʻ qurilish” MCHJ rahbari Ismoil Boʻronov, “Eng yaxshi qovun yetishtirgan fermer” nominatsiyasida Qorakoʻl tumani “Qozon” hududidagi “Hayit Mehmon paxtakor” fermer xoʻjaligi rahbari Toʻraqul Saidov, “Eng yaxshi qovun yetishtirgan fermer” nominatsiyasida Qorovulbozor tumani “Jarqoq” hududidagi “Shahzod Rauf” fermer xoʻjaligi rahbari Uchqun Jabborov, Olot tumani “Zarafshon” hududidagi “I.Ibragimov” fermer xoʻjaligi rahbari Shamsiddin Ibragimov, Romitan tumani “Qoʻrgʻon” hududidagi “Bogʻi Gʻaffor Qoʻrgʻon saxovati” fermer xoʻjaligi rahbari Farhod Azimov, Shofirkon tumani “Joʻyrabot” hududidagi “Murod Qurbonovich” fermer xoʻjaligi rahbari Mehriddin Hamidov gʻolib deb topilib, viloyat hokimligining tashakkurnomasi va maxsus sovgʻalari topshirildi.
Festivalning yopilish marosimida katta gala-konsert sayil qatnashchilariga bayramona kayfiyat ulashdi.
Viloyat hokimligi matbuot xizmati