Buxoro viloyati hokimligi

Bugun, 19-iyul kuni Buxoro shahridagi Yoshlar markazi anjumanlar zalida  eng nufuzli xalqaro fan olimpiadalari, respublika tanlovlari gʻoliblari, ularning ustozlarini tantanali taqdirlash marosimi boʻlib oʻtdi.

Tadbirda soʻzga chiqqan viloyat hokimi Botir Zaripov oʻz bilim va iqtidori bilan jahon miqyosidagi eng nufuzli xalqaro fan olimpiadalarida, respublika tanlovlarida tengdoshlari bilan raqobatga kirishayotgan, sovrinli oʻrinlarni egallab oltin, kumush, bronza medallarni olib kelayotgan, oʻz iqtidor va sanʼatini namoyot etayotgan buxorolik yoshlar safi kengayib borayotganligini faxr bilan qayd etdi.

Taʼkidlanganidek, Prezidentimiz Shavkat Mirziyoyev rahnamoligida yurtimizda maktab taʼlimi sohasini rivojlantirish umumxalq harakatiga aylandi. Taʼlim sifatini oshirish, ayniqsa, iqtidorli oʻquvchi-yoshlarni qoʻllab-quvvatlash davlat siyosati darajasiga koʻtarildi.

Jumladan, aniq, tabiiy fanlar va chet tillarini oʻqitish, kasb-hunar oʻrgatish, musiqa va sanʼatni rivojlantirish ishlariga alohida eʼtibor qaratilib, taʼlim muassasalarida shart-sharoitlar va keng imkoniyatlar yaratildi.

Iqtidorli va qobiliyatli oʻquvchilarni aniqlash, ularning isteʼdodini rivojlantirish maqsadida umumtaʼlim fanlari boʻyicha bir qancha respublika va xalqaro fan musobaqalari tashkil etib kelinmoqda.

Shuningdek, Prezidentimiz tashabbusi bilan ikki yildan buyon maktablarda teatr studiyalari tashkil etilib, musiqa va sanʼat sohasida iqtidorli oʻquvchi-yoshlarni qoʻllab-quvvatlash va ularning salmogʻini oshirishga qaratilgan “Turon” maktab teatri”, joriy yildan boshlab “Iqtidor” maktab ansambli” tanlovlari oʻtkazilishi yoʻlga qoʻyildi.

Birgina viloyatimizning 26 ming nafarga yaqin oʻquvchi-yoshlari ushbu tanlovlar orqali musiqa va sanʼat sohasida oʻz iqtidorlarini namoyon etib, shahar va tumanlarda, qolaversa, barcha maktablarda sanʼat sohasidagi iqtidorli oʻquvchilar jamoalari shakllandi.
Mazkur tanlovlarning respublika bosqichida “Iqtidor” maktab ansambli” tanlovi boʻyicha Gʻijduvon tumanidagi 46-maktabning “Yosh havaskorlar” jamoasi 1-oʻrinni, “Turon” maktab teatri” tanlovi boʻyicha Kogon shahridagi 3-maktabning “Elegant” jamoasi 3-oʻrinni egalladi. Bundan tashqari, “Yosh qutqaruvchi” musobaqasi boʻyicha Buxoro shahridagi 19-maktab jamoasi 1-oʻrinni egallab, xorij safarida boʻlish imkoniyatini qoʻlga kiritdi.

Faxr bilan aytish kerakki, bugungi kunda ushbu bilimdonlarimiz safida jahon maydonlarida muvaffaqiyat qozonib, yurtimiz bayrogʻini koʻklarga koʻtarib kelayotgan buxorolik oʻquvchilar safi ham kengayib bormoqda.

Joriy yilning 21-25-aprel kunlari Turkmaniston davlatida oʻtkazilgan II xalqaro matematika musobaqasida ishtirok etgan 8 nafar buxorolik oʻquvchilarning 6 nafari (2 ta oltin, 2 ta kumush, 2 ta bronza) Oʻzbekiston sharafini munosib himoya qilib, gʻoliblikni qoʻlga kiritdi.
Shuningdek, 8-12-may kunlari ilk bor xalqaro ingliz tili olimpiadasida (ELO International 2025) 30 tadan ziyod davlatdan 150 ta jamoa ishtirok etib, yosh jamoalari (6-10 yosh) oʻrtasida Buxoro shahridagi 29-maktab oʻquvchilari jamoasi nominatsiya gʻolibi, katta yoshli (13-17-yosh) jamoalar oʻrtasida “Bukhara Dynamos” jamoasi faxrli 2-oʻrinni egallab, Oʻzbekistonni ilk ishtirokidayoq eng kuchli TOP-3 jamoa tarkibiga kirib, oʻz salohiyatini namoyon etishiga munosib hissa qoʻshdi.

Yakunlangan oʻquv yili davomida 37 nafar oʻquvchi-yoshlarimiz respublika va xalqaro fan olimpiadalarida gʻoliblikni qoʻlga kiritdi. Jumladan, respublika fan olimpiadalarida 8 ta sovrinli oʻrin (3 ta 1-oʻrin, 3 ta 3-oʻrin, 2 ta 3-oʻrin) qayd etilgan boʻlsa, xalqaro fan olimpiadalarida 29 ta (2 ta oltin, 17 ta kumush, 10 ta bronza) medallar qoʻlga kiritildi.

Tadbir davomida ana shu gʻolib va sovrindor oʻquvchilar, ularning ustozlari viloyat hokimligining tashakkurnomasi,  faxriy yorliq va qimmatbaho esdalik sovgʻalari bilan taqdirlanishdi. 

Tadbirda “Turon” maktab teatri” tanlovi boʻyicha Kogon shahridagi 3-maktabning “Elegant” jamoasi tomonidan “Zamonamiz Avloniysi” spektakli namoyish qilindi. Gʻijduvon tumanidagi 46-maktabning “Yosh havaskorlar” jamoasi va “Barkamol avlod” bolalar maktabi yosh ijrochilari tomonidan tayyorlangan musiqiy kompozitsion chiqishlar tadbirga oʻzgacha shukuh bagʻishladi.

Viloyat hokimligi matbuot xizmati