Buxoro viloyati hokimligi

Ayni kunda Peshku tumanida ham ijtimoiy soha inshootlari, davlat va nodavlat muassasalari qatorida aholi xonadonlarini quyosh paneli bilan jihozlash va muqobil “yashil” energiya bilan taʼminlash jarayoni tizimli tashkil qilingan. 

Tumanning “Bogʻimuso” mahalla fuqarolar yigʻini Doʻrman qishlogʻida yashovchi tadbirkor Rizoqul Murtazoyev ham turar joyida 5 kVt soat quvvatga ega quyosh panelini oʻrnatib, muqobil energiya manbaiga ega boʻldi. Xonadon ahli ayni paytda kundalik isteʼmolidan tashqari, davlatga har oyida 900 ming soʻm atrofidagi elektr energiyasini sotib, har kVtiga 1000 soʻmdan daromadga erishmoqda.  

—Oʻgʻlim Komilni nomidan ”Mikrokreditbank” Yangibozor filiali bank xizmatlari markazidan 24,5 million soʻm kredit mablagʻini rasmiylashtirib, 5 kvt soat quvvatga ega quyosh panelini xarid qilib, uyimiz tomiga oʻrnatdik,—deydi Rizoqul Murtazoyev.—Afzallik jihatlari bor ekan, isteʼmoldan ortganini bemalol davlatga sotib foyda koʻryapmiz. 

Rizoqul Murtazoyev yoshga doir nafaqada boʻlishiga qaramasdan, uy xoʻjaligida tadbirkorlikka qoʻl urgan, chorva mollarini koʻpaytirib, boʻrdoqiga mol boqib, oilasi moddiy manfaatdorligiga erishmoqda. Uning hozirda oila aʼzolari yordami bilan ogʻilxonasida parvarishlayotgan qoramoli soni 16 boshga yetkazilgan. Shundan 6 bosh buqa goʻshtga topshirishga tayyorlangan boʻlsa, bir tomonda 6-7 bosh gʻunajin boqilmoqda. Shu ish ortidan xonadonda 4 kishining bandligi va daromadi taʼminlanmoqda. 

Chorvachilik uchun albatta, ekin yeri zarur. Murtazoyevlar oilasi ham shu maqsadda oʻtgan yili auksionda qatnashib, uylariga yaqin hududdan 30 sotix ekin yerini olishgan. Hozirda bu yerda makkajoʻxori, oʻt beda, bugʻdoy, tariq kabi ozuqabop mahsulotlar yetishtirilib, qishki mavsumga zarur xas-xashak jamgʻarilmoqda. Mirishkor xoʻjalik oylik daromadi esa 8 million soʻmdan kam emas.  

Viloyat hokimligi matbuot xizmati