Buxoro viloyati hokimligi

“Tashabbus” mahallasida yashovchi Goʻzal Navroʻzovaning xonadonida boʻlgan kishining koʻzi quvnaydi. “Sayxunobod tajribasi” asosida shu yil boshida hokimni mahalladagi yordamchisi tomonidan bu kabi xonadonlar “ijtimoiy paketi” tayyorlangan. Aniqrogʻi, bunda tomorqa mehnati, ekin yeri, shuningdek, issiqxonada sabzavot mahsulotlari yetishtirishdan olinayotgan daromad, qolaversa, qoramol va qoʻy-echki boqib, tovuq parvarishlab, shu bilan birga, hovuz qazib tayyorlab baliqchilikni yoʻlga qoʻygan, asalarichilik bilan shugʻullanayotgan yoki tikuvchilik yoʻnalishlarida band boʻlganlar qatorida Navroʻzova uy xoʻjaligi ham hududda namunali xonadonlar qatorida qayd qilingan.  

Bu oila mirishkorlari ham yil boʻyi halol mehnat, astoydil ishlab, toʻkayotgan peshona teri evaziga ekin yerini obod qilib, roʻzgʻorga yarasha kartoshka, piyoz, pomidor, bulgʻor qalampiri kabilarni ekib yetishtirib, bir yoqda ogʻilxonada tuyoq sonini koʻpaytirayotgani eʼtirofga loyiq. Xonadonda ikki bosh sogʻin sigir, 6 bosh nasldor hisori qoʻy, yana tomorqaning bir qismida hovuz tayyorlanib, “oq amur” va “zogʻora” baliqdan 2 mingdan ziyod chavoq tashlab parvarishlanayotgani, bir yoqda oʻnga yaqin asalari oilasini boqib, yilda ikki marta bol yetishtirilayotgani fikrimiz dalili. Bir yoqda esa 1 sotixli issiqxonada kartoshkadan keyin ikkinchi hosil—pomidor yetishtirilmoqda.     

—Yil boshida mahallamizdagi hokim yordamchisiga chorvachilik qilish niyatimiz borligi, shu maqsadda bank krediti ajratilishida amaliy yordam soʻrab borgandik. Hokim yordamchisi tomonidan bizga “ijtimoiy paket” qilib berildi. Boshida nima ekan bu paket degani, deb oʻylandik. Keyin bilsak, paketda barcha yoʻnalishda loyihalar mavjud ekan,— deydi xonadon bekasi Goʻzal Navroʻzova.

—Issiqxonaning oʻzidan pomidor bilan bodring ekib, shu mavsumda 10 million  soʻm daromad qildik. Shu mehnatimizga yarasha dasturxonimizda sarxil sabzavot mahsulotlari bilan birga goʻsht, tuxum, sut, sariyogʻ va boshqa noz-neʼmatlar badastir. Hovlimiz atrofidagi mevali daraxtlarda pishib yetilgan oʻrik, olma, gilos va boshqa mevalardan sharbat, murabbolar tayyorlab, qish tashvishini ham eplayapmiz.     

Albatta, qishloqda oilalarning asosiy daromadi yerdan, dala-dehqonchilik ishlari, tomorqa xoʻjaligidan. Shu bois, hovli etagidagi tomorqasini yashnatib mehnat qilayotgan mirishkorlar ayni kunlarida hosil yigʻib, peshona teri evaziga foyda koʻrishlari tayin.

Viloyat hokimligi matbuot xizmati