Gʻijduvon: Ogʻitma ovuli isteʼmolchilariga suyultirilgan gaz ballonlari uzviy yetkazilmoqda
2025-07-09 19:20:00 / Yangiliklar
Aytish joizki, Buxoroda olis choʻl hududida joylashgan aholi manzillari oʻnga yaqin boʻlsa, aynan Ogʻitma, Choʻlobod, Koʻklam, Kanay qishloqlarini oʻz ichiga olgan “Ogʻitma” ovuli ham shunday tabiat qoʻynidagi manzillardan biri.
Ayni kunda bu hududda 51 ta xonadondagi 60 ta oilada jami 220 nafardan koʻproq, asosan, qozoq millatiga mansub fuqarolar istiqomat qilib kelishmoqda. Ular kundalik turmushda maishiy gaz ballonlari va suyultirilgan gazdan foydalanishadi.
Ushbu ovul aholisiga har oy davomida belgilangan reja-grafik asosida gaz ballonlari “Gʻijduvontumangaz” gaz taʼminoti boʻlimi tomonidan yetkazib berilmoqda. Ob-havoning injiqligi, masofaning uzoqligiga qaramay, gaz tarmogʻi ishchi-xodimlari oʻz vazifalariga masʼuliyat bilan yondashishmoqda. Tunning yarmida “Fayzullo Xubiddin Fayz” masʼuliyati cheklangan jamiyatiga qarashli “Gʻijduvon” gaz toʻldirish shoxobchasi orqali shay qilingan 108 dona maishiy gaz balloni choʻlquvarlar aholi manziliga yetkazilib, kun davomida oʻz egalariga tarqatilib, bu boradagi murojaatlari joyida koʻrib chiqilmoqda.
Muhimi, borish qiyin boʻlgan hudud qishloqlari bir-biridan masofada joylashganiga qaramasdan, aholi isteʼmolchilari oʻz vaqtida maishiy gaz ballonlarini qabul qilishmoqda. Maxsus kartalar orqali toʻlov amalga oshirilib, taʼminot risoladagidek amalga oshirilmoqda.
“Hududgaz Buxoro” gaz taʼminoti filiali tomonidan choʻlquvarlar turmush sharoitini yaxshilash, ularga kundalik zarur ovqat pishirish, choy qaynatish kabi tashvishlarini yengillashtirish maqsadida “zangori olov” har oyda, oʻrtacha 35 kunlik muddatda yetkazilayotgani ogʻitmaliklarni mamnun qilmoqda.
Viloyat hokimligi matbuot xizmati