Kogon tumanida "Bir kontur — bir mahsulot" tamoyili asosida kungaboqar yetishtirilmoqda
2025-07-09 11:55:00 / Yangiliklar
Ayni kunda mahalla “yettiligi" ijtimoiy muhofazaga olingan oilalar mehnatga layoqatli aʼzolariga sugʻorishga qulay, unumdor konturdan tomorqa yeri ajratib berib, sabzavot-poliz va dukkakli mahsulotlar ekib yetishtirishni koʻpaytirishda yaqin hamkor boʻlmoqda.
Shuningdek, hududda ishsiz yoshlar, nogironlar, xotin-qizlar, probatsiya nazoratidagi va migratsiyadan qaytgan hamda yer olish istagida boʻlgan fuqarolarga fermer xoʻjaliklarining gʻalladan boʻshagan 400 gektarga yaqin yer maydonlarida takroriy ekin ekib, dehqonchilik qilishlari, daromad topishlari uchun imkoniyat yaratilmoqda. Takroriy ekin davrida yer haydab, ekish, parvarishlashni jadal olib borish, sabzavot, turp, makkajoʻxori, kungaboqar, qizil lavlagi, tariq, qolaversa, ozuqabop mahsulotlar ekib yetishtirishni tashkil etish kabi agrotexnik tadbirlarga eʼtibor kuchaytirilgan.
Bu yerlarda sabzavot-poliz mahsulotlaridan moʻl hosil yetishtirilayotgani, astoydil dehqonchilik qilinayotgani ortidan yiliga ikki-uch martadan, peshma-pesh hosil olinayotgani oʻnlab oilalar moddiy manfaatdorligi va ehtiyojini taʼminlamoqda.
Aholi bandligini taʼminlash va daromad manbalarini oshirish maqsadida “Milliybank” aksionerlik tijorat banki Kogon filiali bank xizmatlari markazi koʻmagida “Bir kontur—bir mahsulot” tamoyili asosida navbatdagi samarali loyiha amalga oshirildi.
Jumladan, tumanning “Sarayon” mahalla fuqarolar yigʻini Koʻchatzor qishlogʻida “Alisher Sitora Dilsora” oilaviy korxonasi tasarrufiga rasmiylashtirib berilgan 10 gektar yer maydonida sanoat usulida kungaboqar ekib yetishtirilmoqda.
—Tijorat banki bilan hamkorlikda 100 million soʻm imtiyozli kredit mablagʻini olib, erta bahordan yer tayyorlab ishga kirishganimiz bugunga kelib oʻz samarasini bermoqda,—deydi mazkur oilaviy korxona rahbari Akmal Mahmudov.—Urugʻ yangi, Xitoy naviga mansub boʻlib, mahalliy sharoitga moslashtirilgan, zarur agrotexnik tadbirlarni olib borib, har gektar yerdan hosildorlikni 4 tonnadan oshirish harakatidamiz. Shu kunlarda yigʻim-terimga tayyorgarlik koʻrmoqdamiz.
Mutaxassislar hisob-kitobiga koʻra, har gektar yer hosildorligiga muvofiq, har kilogram kungaboqar mahsuloti 40 ming soʻmdan sotilishi moʻljallangan boʻlib, natijada mirishkor bundan 160 million soʻmdan oshirib daromad olishni maqsad qilgan.
Viloyat hokimligi matbuot xizmati