Peshku: “Bir kontur—bir mahsulot” tamoyili asosida “Sadir”da yana 7 gektar yerda pomidor yetishtirildi
2025-07-08 19:35:00 / Yangiliklar
Masalan, aksionerlik tijorat “Xalq banki” Peshku tuman filiali bank xizmatlari markazi tomonidan “Bir kontur — bir mahsulot” tamoyili asosida dehqon xoʻjaliklari, tomorqa yer egalari bilan yaqin hamkorlikda ish olib borilayotgani oʻz samarasini bermoqda. Manzilli olib borilayotgan ishlar natijasi oʻlaroq, ayni kunda “Sadir” MFY dagi 517-konturdan tanlangan, maydoni 7 gektarni tashkil etgan yer maydonida barpo qilingan issiqxona yerida serhosil navlarga mansub pomidor yetishtirilgan.
Hududda har bir gektar yer maydoni ijtimoiy muhofazaga olingan oilalarning mehnatga layoqatli 22 nafar aʼzosiga 30 sotixdan ajratib berilib, birinchi ekin oʻrnida yil boshi, fevral oyidan plyonka ostida pomidor koʻchati koʻchirib oʻtqazilgan. Auksion savdolari orqali xarid qilingan bu yerda qishloq xoʻjaligi mahsulotlari yetishtirilishini tashkil etish va hosilni sotib olib, dehqonlarga daromad manbaini yaratib berish uchun esa agregator sifatida “Sharipov Otabek Shomurodovich” MCHJ tanlangan.
Parvarish agrotexnik talablar asosida olib borilib, iyun oyidan pishib yetilgan hosilni yigʻib-terib olishga kirishilgan. Shu kunlarda bu manzildagi dehqon xoʻjaliklarida qirqdan oshiq fuqaro, oʻnlab oilaning dala-dehqonchilikdan moddiy manfaatdorligi taʼminlanmoqda.
Hosildorlikka kelsak, har bir gektar yer maydoni uchun birinchi hosilda oʻrtacha 60 tonnaga yaqin mahsulot yetishtirildi va har kilogram pomidor mahsuloti oʻrtacha 10 ming soʻmdan sotildi. Ikkinchi hosilda esa har bir gektar yer maydonidan oʻrtacha 20-30 tonna mahsulot, yaʼni bodring yetishtirilishi rejalashtirilgan. Xoʻjaliklarda takroriy yetishtiriladigan yalpi hosil xirmonini qariyb 200 tonnaga yetkazish maqsad qilingan. Albatta, kuzgi mavsumda bundan erishiladigan daromadni chamalash qiyin emas.
Xulosa shuki, “Bir kontur – bir mahsulot” tamoyili asosida amalga oshirilayotgan mazkur loyiha dehqon-mirishkorlar moddiy ahvolini yaxshilash bilan birga qishloq joylarda ish oʻrinlarini yaratish, zamonaviy agrotexnologiyalarni joriy etish va mahsulotlarni bozor talabiga mos ravishda yetishtirishda muhim ahamiyat kasb etadi.
Viloyat hokimligi matbuot xizmati