Buxoro viloyati hokimligi

Bu borada Qorakoʻl tumani “Doʻstlik” MFY da yashovchi Maʼrufbek Sharipov ham oʻz tashabbusini amalga oshirib, avtomobillarga texnik xizmat koʻrsatish bilan shugʻullanishni boshlagan. Hokimning mahalladagi yordamchisi tavsiyanomasi asosida “Biznesga birinchi qadam—yoshlar uchun” loyihasi doirasida “Aloqabank” tuman filiali tomonidan 70 million soʻm imtiyozli bank kredit mablagʻi ajratilgan. Bank sarmoyasi hisobidan qoʻshimcha jihozlar olib kelinib, faoliyat kengaytirilgan. Hozirda Maʼrufbek Sharipov qoʻshni maalla va qishloqlardan ham mijozlar orttirmoqda.  

—Har jabhada tashabbuskor, oʻylab yurgan ishini rivojlantirish ilinjida boʻlgan mahalladoshlarimizni moddiy qoʻllab-quvvatlash maqsadida 2025-yilda bizga umumiy qiymati 2,5 milliard soʻm miqdoridagi bank imtiyozli kredit sarmoyasi ajratilgan, — deydi tuman hokimining “Doʻstlik” MFY dagi yordamchisi Mehroj Himmatov. — Shundan bugunga qadar 1 milliard 200 million soʻm mablagʻ moliyalashtirilib, oʻz egalari, tashabbuskor yoshlar loyihalariga ajratilgan. Natijada turli jabhada kichik sex koʻrinishidagi ishlarga qoʻl urilib, mahalladoshlarimizga daromad manbai yaratilmoqda. Aniqrogʻi, shu yil yarmi davrida mahallada 27 ta mikroloyiha, 21 ta oilaviy tadbirkorlik faoliyati yoʻlga qoʻyilgani evaziga oʻnlab xonadonlar moddiy manfaatdorligi taʼminlanmoqda.   

Chekka tumanda ayollar tadbirkorligini qoʻllab-quvvatlash, xotin-qizlarning iqtisodiy, ijtimoiy faolligini oshirish boʻyicha ham qator ishlar amalga oshirilmoqda. Imkoniyatlardan foydalanib aynan "Doʻstlik" MFY da Latofat Shokirova boshchiligida "Sultana" ayollar goʻzallik saloni faoliyat boshlaganiga koʻp vaqt boʻlmadi.

Ahamiyatlisi, ayni kunda bu salonda 4 nafar xotin-qiz bandligi taʼminlanmoqda.  Biznes tamoyiliga koʻra, "Sultana" ayollar goʻzallik shaxobchasi har bir mijozga alohida eʼtibor qaratib, soch turmaklash, makiyaj, manikyur-pedikyur kabi xizmatlarini taklif etmoqda. Bu doʻkonda yuzga yaqin turdagi kelinlar liboslari ijarasi ham tashkil qilingan. 

—Bundan oʻn yil oldin tuman markazidagi goʻzallik salonida ishimni shogird sifatida boshlagandim, — deydi bugun tadbirkorga aylangan Latofat Shokirova. —Bir vaqtning oʻzida ham ishlab, ham oʻrganishimga toʻgʻri keldi, ammo ortga chekinmaganim bois bugun oʻz mustaqil ishimga erishib, daromadimni topayapman. Endilikda shogird ham tayyorlab, xotin-qizlarga xizmat koʻrsatish sifatini oshirish harakatidamiz. 

Viloyat hokimligi matbuot xizmati