Peshku: Ibn Sino mahallasida 9 gektarli dehqon xoʻjaliklarida pomidor yetishtirildi
2025-07-05 12:00:00 / Yangiliklar
Hududda ikki-uch yil burun 5 gektar maydonda barpo etilgan issiqxona maydoni bugunga kelib 25 gektarga kengaytirilib, bunda sabzavot-poliz mahsulotlari yetishtirish salmogʻi oshirilmoqda. Hududda "Peshku tajribasi"ni ommalashtirish, boshqa hududlarda ham shunday ixcham, kamxarj va serdaromad issiqxonalar tashkil etish chora-tadbiri koʻrilmoqda. Dala tomorqasida tashkil etilgan issiqxona xoʻjaligida mahsulot yetishtirish tahlil qilinganda, deylik, 1 sotix maydonda pomidor yetishtirilganda, yiliga oʻrtacha 7 tonna mahsulot olish, shunga yarasha moddiy manfaatdorlikka erishish mumkin.
Ayni yil boshidan “Agrobank” tuman filiali “Bir kontur—bir mahsulot” tamoyili asosida issiqxona xoʻjaliklarini moddiy qoʻllab-quvvatlab, sabzavot-poliz mahsulotlari yetishtirilishida yaqin hamkorlikni yoʻlga qoʻygan. Bu bilan tomorqa xoʻjaliklarida oʻnlab oilalarning moddiy manfaatdorligi taʼminlanmoqda.
Mazkur loyiha aynan Ibn Sino mahallasida amalga oshirilib, bir paytlar paxta ekib yetishtirilgan 568-raqamli konturda, yaʼni umumiy maydoni 9 gektardan iborat ekin yerida joriy yil boshidan pomidor ekib yetishtirildi. Har bir gektar maydon 30 sotixdan 30 nafar ehtiyojmand oila aʼzosiga teng taqsimlab berilib, birinchi ekin sifatida fevral-iyun oylarida pomidor hosili yetishtirilib, saranjomlandi.
Hosildan boʻshatilayotgan yerda ikkinchi ekin avgust oyida bodring mahsuloti ekib yetishtirilishi, bu bilan 60 dan ortiq fuqaro bandligini taminlash koʻzda tutilgan. Auksion savdosi orqali xarid qilingan 10 gektar ekin yeriga taʼminotchi agregator sifatida “Peshku agro dehqon” ishlab chiqarish korxonasi tanlangan. Tayyor mahsulotni sotib olish va realizatsiya qilish, dehqon xoʻjaligi mehnatiga haq toʻlash uning zimmasidagi vazifa.
Hosil yetishtirish jarayoni va iqtisodiy samaradorlikka toʻxtalsak, ayni shu kunlarda bu yerdan 65 tonnaga yetkazilib pomidor hosili yetishtirilgan va har kilogram hosil oʻrtacha 7-10 ming soʻmdan xaridorini topgan. Bu umumiy hisobda 500 million soʻm daromad degani. Hozirda takroriy ekinga tayyorgarlik ishlari, ikkinchi hosilga yer tayorlash agrotexnik tadbiriga kirishilgan. Ikkinchi hosilda har bir gektar yer maydonidan oʻrtacha 20-30 tonna mahsulot yetishtirilishi maqsad qilingan.
Viloyat hokimligi matbuot xizmati