Buxoro viloyati hokimligi

Qayd etilishicha,  tumanda 279 ta fermer xoʻjaligi mavjud boʻlib, ularning 240 tasi paxta-gʻallachilik, 6 tasi bogʻdorchilik-uzumchilik, 5 tasi sabzavot-polizchilik, 13 tasi chorvachilik, 2 tasi gʻallachilik, 3 tasi baliqchilik, 4 tasi asalarichilik va  6 tasi boshqa yoʻnalishda faoliyat yuritmoqda. 

Tumanda 2025-yil gʻalla hosili uchun 223 ta fermer xoʻjaliklari tasarrufidagi  6 ming 34 gektar maydonda gʻalla ekilib, parvarish qilingan. Don korxonalari va fermer xoʻjaliklari oʻrtasida 16 ming 816 tonna, shundan, vaqtinchalik saqlash uchun 10 ming 316 tonna va davlat xaridi uchun 6 ming 500 tonna don topshirish boʻyicha shartnomalar tuzilgan. 

Hozirgi kunga qadar barcha fermer xoʻjaliklarida gʻalla oʻrim-yigʻim ishlari yakunlangan. Tumanda gʻalla shartnomaviy rejasi 17007 tonnaga yoki rejaga nisbatan 101,1 foizga bajarilgan. 

Tumanda gʻalladan boʻshagan 5 ming 915 gektar maydonda takroriy ekinlar ekish rejalashtirilgan. Jumladan, 213 gektar dukkakli, 730 gektar moyli, 315 sabzavot, 220 gektar poliz, 150 gektar kartoshka, 1988 gektar ozuqabop, 2298 gektar tariq, 951 gektar paxta ekish boʻyicha ishlar olib borilmoqda. 

Shuningdek, 2025-yil hosili uchun 248 ta fermer xoʻjaliklari tomonidan 8 ming 100 gektar maydonda chigit ekilib, parvarish qilinib kelinmoqda. Bugungi kunda gʻoʻza maydonlarini 1-2-oziqlantirish ishlari toʻliq tugatilgan.  

Uchrashuvda hozirgi issiq ob-havoda gʻoʻza hosilini saqlab qolish  maqsadida amalga oshiriladigan agrotexnik tadbirlar muddatida va sifatli amalga oshirish boʻyicha fermer xoʻjaliklari rahbarlariga tushuntirishlar berildi. 

Oʻz navbatida uchrashuvda ishtirok etgan fermerlar mavjud muammolari bilan viloyat rahbariga yuzlanishdi. Xususan, “Sayyot” hududini suv bilan taʼminlovchi “Zarafshon” daryosining 1,5 km, “Chandirobod”, “Quvvacha”, “Jigʻachi”, “Qoraxoji”, “Qoraun” hududlarini suv bilan taʼminlovchi “Yomonjar” kanalining 26 km qismini qazish, klaster va fermerlar oʻrtasidagi hisob-kitoblarni amalga oshirish kabi masalalar oʻrtaga tashlandi. 

Botir Zaripov bu borada masʼul rahbarlarga tegishli topshiriq va koʻrsatmalar berdi. 

Bundan tashqari, viloyat rahbari gʻoʻza parvarishini kechiktirmaslik, gʻalladan boʻshagan maydonlarga takroriy ekin ekish, quyosh panellari oʻrnatish hamda suv tejovchi texnologiyalardan keng foydalanish boʻyicha ham tavsiyalarini bildirdi.

Qolaversa, eksport salohiyatini yaxshilash, oziq-ovqat xavfsizligini taʼminlash, aholining arzon va sifatli mahsulotlarga boʻlgan ehtiyojini qanoatlantirish masalalari yuzasidan ham fikr almashildi.

Shuningdek, viloyat rahbari “mahalla yettiligi” vakillari bilan ham muloqot qildi. Unda aholi daromadlarini oshirish, bandlikni taʼminlash, tadbirkorlikni rivojlantirish, erta nikohlarning oldini olish, xotin-qizlar va yoshlar bilan ishlash kabi dolzarb masalalar muhokama qilindi. 

Umuman, mahallalardagi ijtimoiy, iqtisodiy, infratuzilmaviy masalalar batafsil koʻrib chiqilib, bu borada zarur chora-tadbirlar belgilandi. 

Viloyat hokimligi matbuot xizmati