Buxoro viloyati hokimligi

Davlatga sotilganidan tashqari, mahalliy fermer xoʻjaliklari ixtiyorida qoldirilgan yana shuncha miqdordagi bugʻdoy daromadidan oʻnlab oilalar moddiy manfaatdorligi oshirilmoqda. Joriy yilda ham tumanda gʻalla yetishtiriladigan maydon 390 gektarga kengaytirilgani holda gʻallakorlikda  katta tajribaga ega 155 ta fermer xoʻjaligi tomonidan davlat omboriga 16 ming  tonnadan oshirib gʻalla xirmoni kiritilgani yil boʻyi sidqidil qilingan mehnat mahsuli, albatta. 

Ha, tabiiy iqlimi nisbatan issiq choʻlquvarlar kengliklarida har yilgi anʼanaga muvofiq bu yil ham gʻalladan barakali hosil yetishtirildi. Dehqonchilikning muhim agrokompleksi paxta va gʻallachilikda oʻziga xos maktab yaratilgan hududda bu yilgi qiyinchiliklar, favqulodda tabiat hodisalari yetkazgan talofatlarga qaramasdan, koʻzlangan sara bugʻdoy xirmoni bunyod qilindi. 

“Jarqoq”, “Navbahor”, “Boʻzachi” MFY larida faoliyat yuritayotgan jami 155 ta fermer xoʻjaligida asosan “Yelanchak”, “Alekseevich”, “Grom” navlaridan moʻl hosil yetishtirildi. Gʻalla oʻrimida yuqori unumdor 20 dan ortiq kombayn agregati va donni tashishda ularga yaqindan koʻmaklashgan yuzga yaqin yuk avtomashinasi kuchidan foydalanilgani samarasini berdi.   

Bugʻdoy hosilini sifatli oʻrib, saranjomlab olishda yoqilgʻi taʼminoti va texnik xizmat koʻrsatuvchilar, ichki ishlar hamda yongʻin xavfsizligi xodimlari ham jalb etildi. Maqsad mirishkor fermer xoʻjaliklari ixtiyorida qoladigan hosildan tashqari shartnoma rejasida belgilangan 16 ming tonna sara donni davlat omboriga kiritish edi. Bugun bu “marra” uddalanib, koʻzlangan hosil “Qorovulbozor” hamda “Jarqoq” don qabul qilish maskanlarida saranjomlandi.

Tumanda davlat xaridiga mos talab qilingan hosil oshigʻi bilan uddalangan boʻlsa, hududdagi fermer xoʻjaliklarining deyarli barchasi mehnat muvaffaqiyatiga erishdi. Xususan, Sharofiddin Qurbonov boshchiligidagi “Haydar polvon zamini, Hasan Roʻziyev boshchiligidagi “Istiqlol”, Axtam Davronov rahbarligidagi “Axtam Davron”, shuningdek, Jarqoq va Boʻzachi hududlaridagi “Faxriddin Fayozbek”, “Bahrom Rahmon”, “Xushnudbek zamini”, “Yaxyo Javohir”, “Umar Sharif”, “Rahimbobo”, “Muborak Zarbuloq”, “Erdon Juma” kabi fermer xoʻjaliklaridabarakali xirmon barpo qilindi. Bu yutuq halol mehnat, astoydil peshona teri bilan don ekib, bugʻdoy yetishtirib, rizq-nasiba manbaini yaratayotgan mirishkorlar moddiy manfaatdorligi uchun, albatta.   

Shu boisdan, bugun choʻlquvarlar zamini dehqon gʻallakorlarini, qorovulbozorliklarni bu erishilgan mehnat gʻalabasi bilan chin qalbdan muborakbod etamiz. 

Viloyat hokimligi matbuot xizmat