Buxoro viloyati hokimligi

Yalpi gʻalla xirmoni 36 ming tonnaga yetkazilgan hududda fermer xoʻjaliklari jamoalari mehnati bilan har gektar hosildorligi 70 sentnerdan oshirilgan. Joriy yil mavsumida ekin yer va albatta, mahsuldorlik ham oshirib borilayotgani zamirida avvalo aholining bugʻdoyga, nonga boʻlgan talab va ehtiyoji ortib borayotgani yotibdi.   

Bu yil chekka tumanda gʻallachilikka ixtisoslashgan 316 ta fermer xoʻjaligi tomonidan 5412 gektar maydonda boshoqli don ekinlari ekib parvarishlanib, bor kuch va imkoniyat davlat xaridi uchun 16 ming 268 tonna sara don xirmonini bunyod qilishga qaratildi. Bundan tashqari, hududda 2 ming 837 tonna bugʻdoy jamgʻarish ishlari jadal bormoqda. 

Agrotexnik tadbirlarning oʻz vaqtida va sifatli olib borilgani, elimiz rizq-roʻzi manbai—gʻallani qisqa muddatda yigʻib-yanchib olish maqsadida 16 ta otryad tashkil qilinib, zamonaviy rusumdagi yuqori unumdor kombayn agregatlari va ularga yetmishdan shiq yuk tashish avtomashinasi biriktirilgani, dala mehnatkashlariga zarur texnik xizmat koʻrsatuvchi, taʼminotchi, yoqilgʻi-moylash, ehtiyot qism mobil xizmatlari joriy qilingani bugun zalvorli mehnat muvaffaqiyatini taʼminlamoqda. 

Terim jarayonini uyushqoqlik bilan tashkil qilgan peshkoʻlik gʻallakorlar zimmalaridagi majburiyatni 101 foizga uddalab, bugun mehnat muvaffaqiyatiga erishdilar. Davlatga 16 ming 300 tonnadan ortiq sara navlarga mansub don topshirildi. 

Har bir mehnat muvaffaqiyatida peshqadam yetakchi xoʻjaliklarning oʻz oʻrni bor, albatta. Tumandagi  “Ibn Sino”, “Istiqbol”, “Peshku”, “Chibogʻoni” "Sharif Ergash", "Zandani" hududlaridagi fermer xoʻjaliklarida har gektar hosildorligini 75-80 sentnergacha yetkazgan ilgʻorlar safi kengaymoqda. Xususan, “Botir Oʻtkir Abdulaziz”, “Aslon Farmon fayz”, “Feruz”, “Bekravot Eshonbozor”, “Rajab Qosim”, “Qurbon Ashur”, “Malishoyak”, “Zulfiya Toʻra qizi”, “Oltirabot tulpori”, “Turon”, kabi fermer xoʻjaliklarida hosildorlik salmogʻi 75 sentnerdan oshirilgani yuqoridagi fikrimizga dalil. 

Jumladan, tumanda "Buxoro servis agroklaster" MCHJ tomonidan har yilgi rizq-roʻz manbai—gʻalla yetishtirish mavsumida 350 gektar maydonda sara navli bugʻdoy hosili parvarishlanib, barakali xirmon barpo qilindi. Mirishkor gʻallakorlar mavsumni yuqori kayfiyatda, yalpi xirmonni 2400 tonnadan oshirishning uddasidan chiqdilar. 

Ekinlar zamonaviy texnologiyalar asosida parvarish qilinishi samarasida maysa tuplarida boshoqlar boʻliqligi taʼminlanib, kutilgan hosil yetishtirildi. Hosilni rivojlanishida tajribali mirishkorlar maslahati asosida ish yuritilgani, suvdan tejab, oqilona foydalanilgani va mahalliy, mineral oʻgʻitlar bilan oʻz vaqtida oziqlantirilib, zamonaviy texnologiyalar asosida parvarishlangani yutuqlar omili boʻldi.  

Erishgan mehnat gʻalabangiz muborak boʻsin, qadrli peshkulik gʻallakorlar! 

Viloyat hokimligi matbuot xizmati