Buxoro viloyati hokimligi

Dala-dehqonchilik ishlari toʻgʻri va omilkorlik bilan olib borilib, agrotexnik tadbirlar kechiktirmasdan, sifatli oʻtkazilgani samarasi oʻlaroq, roppa-rosa bir yil burun, 2024-yil yozida Romitan tumanida faoliyat yuritayotgan 274 ta fermer xoʻjaligi tomonidan 6414 gektar maydonda boshoqli don ekinlari yetishtirilib, oʻrim-yigʻim davrida davlatga qabul maskaniga 17 ming tonnadan oshirib sara bugʻdoy sotilgan. Gʻallachilikda koʻzlangan xirmon nafaqat viloyatda, balki respublikada peshqadamlar safida barpo qilingan.

Bundan tashqari, tumanda koʻp tarmoqli subyektga aylanayotgan “BCT Cluster Agrokompleks” masʼuliyati cheklangan jamiyati tomonidan oʻtgan yil hosili uchun 1850 gektar maydonda gʻalla yetishtirilib, davlat xaridiga muvofiq, 7 ming tonna sara bugʻdoy xirmoni yaratilgan. 

Tumanda joriy yil hosili uchun 315 ta fermer xoʻjaligi tomonidan 6414 gektar maydonda boshoqli don ekinlari parvarishlanib, davlatga 16 ming 386 tonna gʻalla topshirish, bundan tashqari, 3 ming 18 tonna sara don topshirish maqsad qilingandi. Agrotexnik tadbirlarning oʻz vaqtida va sifatli olib borilgani, gʻallani qisqa muddatda yigʻib olish maqsadida tegishli otryadlar tuzilib, zarur texnikalar bilan taʼminlanishi oʻz samarasini berdi. Oʻrim-yigʻimni uyushqoqlik bilan tashkil qilgan romitanlik gʻallakorlar bugunga kelib har yilgi anʼanaga sodiq qolgan holda davlatga 19 ming tonnadan ortiq don topshirib, shartnomaviy rejani oshigʻi bilan uddaladilar. 

Mavjud gʻalla maydonlari mavsumga puxta tayyorlanib, 24 ta otryad tashkil etilgani, otryadlarga 24 ta yuqori unumli don oʻrish kombayni, donni qabul maskaniga tashish uchun 72 ta yuk avtomashinasi, shuningdek, 3 ta koʻchma ustaxona hamda 5 ta yoqilgʻi tarqatish agregati biriktirilgani oʻz samarasini berdi. 

Oylab ter toʻkib qilingan mashaqqatli mehnat mahsulini “Xalqobod”, “Chelongʻu”, “Qoʻrgʻon”, “Nurafshon”, “Yangiobod” hududlaridagi oʻnlab fermer xoʻjaliklari erishgan muvaffaqiyatlar misolida ham koʻrish mumkin. Bu subyektlarda har gektar hosildorligi 75 sentnerni tashkil etayotgani, yana oʻnlab tonna sara bugʻdoy fermerlar qoʻli ostidagi mehnat jamoalari ixtiyorida qolayotgani katta yutuq, albatta. Xususan, “Xalqobod Fayz zamini”, “Saida”, “Sherzod”, “Haydar ota”, “Fayz”, “Tong”, “Sardor-2018” kabi fermer xoʻjaliklarida bu hosildorlik 80 sentnergacha yetkazildi. 

Ekinlar zamonaviy texnologiyalar asosida parvarish qilinishi samarasida maysa tuplarida boshoqlar boʻliqligi taʼminlanib, kutilgan hosil yetishtirildi. Hosilni rivojlanishida tajribali mirishkorlar maslahati asosida ish yuritilgani, suvdan tejab, oqilona foydalanilgani va mahalliy, mineral oʻgʻitlar bilan oʻz vaqtida oziqlantirilib, zamonaviy texnologiyalar asosida parvarishlangani yutuqlar omili boʻldi. Bu kabi innovatsion texnologiyalarni keng qoʻllash, nisbatan kam mehnat bilan moʻl hosil yetishtirish tajribasi yil sayin puxta oʻzlashtirilmoqda. 

Mehnat gʻalabangiz muborak boʻlsin, aziz romitanlik gʻallakorlar! 

Viloyat hokimligi matbuot xizmati